Nýbökuð mamma með sixpakk

Dísa Rhiannon Edwards, 26 ára starfsmaður Fríhafnarinnar sem er um það bil að klára meistaragráðu í talmeinafræði átti erfitt með að þyngja sig eftir að hún eignaðist frumburðinn, Ariu Rhiannon Dupree. Hún ákvað að byrja í Crossfit og viti menn árangurinn lét ekki á sér standa. 

„Ég eignaðist Ariu 28. mars árið 2013 og fór í mömmuleikfimi í Sporthúsinu í Keflavík sex vikum eftir að ég átti hana. Mér fannst rosalega gott að fara í þá tíma og þeir hjálpuðu mér mikið að koma mér af stað aftur eftir barnsburðinn," útskýrir Dísa. 

„Það er mikilvægt að fara ekki of geyst af stað en í þessum tímum ertu að gera æfingar með það í huga að þú sért nýbúin að eignast barn. Eftir það fór ég sjálf að æfa í ræktinni og var í rauninni komin í „gott form" eftir mömmu-leikfimina. Það sást til dæmis ekkert á mér tveimur mánuðum eftir að Aria fæddist að ég hafi verið að eiga barn."

„Mér fannst ég samt ekki vera komin í gott form því vandamálið mitt var að ég var allt of grönn. Ég hélt engu utan á mér sama hvað ég borðaði og sama hvað ég lyfti mikið. Ég fór alveg niður í 49 kg sem er allt of létt."

„Ég ákvað svo í apríl 2014, ári eftir að ég átti stelpuna, að byrja í Crossfit hjá CF Suðurnes og sé alls ekki eftir því. Ég er sem sagt búin að æfa Crossfit núna í fjóra mánuði og ég sé rosalega mikinn árangur sem ég hef aldrei séð áður og er sennilega komin í mitt besta form ever." 

„Mataræðið mitt er rosalega venjulegt. Ég reyni að hafa mataræðið sem hollast alla virka daga en leyfi mér alveg það sem ég vil um helgar. Ég þarf samt að borða rosalega mikið af kolvetnum til að halda í það sem ég er að byggja upp." 

„Ég æfi Crossfit alla daga vikunar nema sunnudaga. Ég vil koma því á framfæri að það er allt hægt ef viljinn er til staðar. Það tekur bara tíma og vinnu," segir Dísa.