Nýtt húsnæðislánakerfi verði tekið upp

Verkefnisstjórn um framtíðarskipan húsnæðismála kynnti tillögur sínar í dag. Fjármögnun húsnæðislána verður breytt, húsnæðissparnaður festur í sessi og leigumarkaður efldur.

Í tillögunum er lagt til að tekið verði upp nýtt húsnæðislánakerfi þar sem sérhæfð húsnæðislánafélög annast lánveitingar um allt land og umgjörð allra húsnæðislána miðast við jafnvægi milli útlána og fjármögnun lánanna. Jafnvægi milli útlána og útgefinna skuldabréfa mun gilda um öll húsnæðisveðlán og verða lán í nýju kerfi óverðtryggð.

Þá er lagt til að Íbúðalánasjóði (ÍLS) verði breytt og núverandi verkefnum hans skipt upp, annars vegar í nýtt, opinbert húsnæðislánafélag sem annast almennar lánveitingar til húsnæðismála án ríkisábyrgðar. Hins vegar verður mörgum af þeim verkefnum sem ÍLS sinnir í dag, ásamt viðbótarverkefnum sem lögð eru til af verkefnisstjórn færð til sérstakrar stofnunar, meðal annars verkefni sem snúa að opinberri stefnumótun í húsnæðismálum.

Lagt er til að húsnæðissparnaður verði festur í sessi og heimild til að nýta séreignasparnað vegna húsnæðisöflunar verði varanleg.  Jafnframt verður heimild til fullrar endurgreiðslu á virðisaukaskatti vegna húsnæðisframkvæmda varanleg. Núverandi lánasafn verður látið renna út.