Harry Bretaprins tjáir sig um hryllinginn í Afganistan

Harry Bretaprins hefur tjáð sig um þann hrylling sem hann upplifði þegar hann sinnti herþjónustu í Afganistan, annars vegar árið 2007 og svo aftur árið 2012. Hann langar til þess að heiðra þá hermenn sem snúa aftur til Bretlands eftir að hafa sinnt herþjónustunni.

„Ég hafði aldrei upplifað slíkt af eigin raun,“ skrifar Harry í grein sem birtist í The Sunday Times eða Sunnudagsblaði Times í Bretlandi. „Með því á ég við þau meiðsli sem höfðu hlotist aðallega vegna heimatilbúins sprengjubúnaðar (e. Improvised explosive device - IED). Mannskaði er eins hörmulegt og sorglegt og það gerist en að sjá þessa ungu menn – miklu yngri heldur en ég – umvafna plasti eftir að hafa misst útlimi, með hundrað rör og slöngur tengdar við þá, var eitthvað sem ég hafði aldrei undirbúið mig undir.“

En innan um eyðilegginguna, sá hann einnig hermenn komast lífs af og fann fyrir þörf til þess að bjóða því fólki framtíð og von þar sem þau sneru aftur til hverdagslífsins.

Í næsta mánuði, rétt áður en hann verður þrítugur verða haldnir Invictus leikarnir en þar keppa 400 fyrrum hermenn frá fjórtán löndum sem slösuðust alvarlega við að sinna herþjónustu. Invictus merkir ósigraður og  dreymdi Harry bretaprins um að koma slíkri hátíð á koppinn. Hann var viðstaddur slíka leika í Bandaríkjunum árið 2012, The Warrior Games, og vildi færa þá á alþjóðlegan vettvang. „Þetta var einn af ótrúlegustu og mest hvetjandi hlutum sem ég hef upplifað. Sumir keppenda höfðu legið í sjúkrarúmi, ekki meira en átta mánuðum fyrr, og var sagt að þeir myndu aldrei ganga aftur,“ skrifar Harry.