Upp undir 80 prósent hafa stundað vinnu í veikindum

Nærri sex af hverjum tíu undir þrjátíu og fimm ára aldri hafa mætt veikir í vinnu síðastliðna 12 mánuði.

Þetta er meðal þess sem lesa má úr nýrri kjarakönnun Bandalags háskólamanna (BHM).

Þar kemur jafnframt fram að hátt hlutfall aðspurðra, upp undir 80 prósent, hafi annaðhvort mætt í vinnu eða unnið heima, hvort heldur er í eigin veikindum eða veikindum barns.

„Einhverra hluta vegna er mjög sterk fylgni við aldur,“ segir Guðlaug Kristjánsdóttir, en hún kynnir niðurstöðurnar á morgunverðarfundi BHM um veikindavinnu í dag.

Hún segir hins vegar óvíst af hverju líklegra sé að þeir sem yngri eru vinni fremur í veikindum.

Mögulega gæti verið um að ræða hærri tíðni veikinda, mismunandi skilgreiningar á því að vera veikur og svo gæti hærri tíðni líka tengst veikindum barna í meira mæli en hjá eldri hópum.

Í greiningu á niðurstöðunum kemur hins vegar fram að í sjö aldursflokkum af níu eru konur líklegri til að mæta veikar til vinnu en karlar.

Í raun er það bara undir þrítugu þar sem karlar mæta fremur veikir (59 prósent á móti 53 prósentum kvenna) og á aldursbilinu 50 til 54 ára (41 prósent á móti 37 prósentum).

Í öðrum aldursflokkum upp að sextugu eru konur að jafnaði umtalsvert líklegri til að mæta veikar.

Guðlaug segir samanburð á milli landa dálítið erfiðan því uppbygging vinnumarkaðar kunni að vera ólík eftir löndum.

Tölur um mætingu á vinnustað í veikindum virðist þó ekki langt frá því sem gerist að jafnaði í Evrópusambandslöndunum.

Þar sé jafnaðartalan um 40 prósent, en er 44,3 prósent í könnun BHM.

„Svo er þetta allt upp í 80 prósent á Norðurlöndunum og það er í rauninni þessi tala sem við fáum þegar horft er á sveigjanlegu vinnuna, að vinna heiman frá sér.“ 

Að auki segir Guðlaug svo fleiri þætti geta spilað inn í. Til dæmis benti Jónína Waagfjörð, deildarstjóri hjá VIRK starfsendurhæfingarsjóði, á það á fundi BHM, að dæmi væru um að fyrirtæki greiddu háa bónusa til þeirra sem væru til dæmis undir sex veikindadögum á ári. 

„Þarna er kominn ákveðinn hvati, því þeir sem fara yfir þessa tölu fá ekkert.“

Í kjarakönnun BHM koma svo fram fleiri áhugaverðir hlutir, að mati Guðlaugar. Þannig megi sjá að þeir sem mæti veikir til vinnu séu að jafnaði óánægðari í starfi en þeir sem ekki geri það. Þá kemur fram að þessi hópur sé að jafnaði óánægðari með laun sín. 

Um leið kemur fram að þeir sem hafa mannaforráð og þeir sem bera fjárhagslega ábyrgð í vinnu sinni mæti fremur veikir til vinnu.