Rannsókn á íslenska eldsneytismarkaðnum miðar vel

Markaðsrannsókn Samkeppniseftirlitsins á íslenska eldsneytismarkaðnum miðar vel að sögn Páls Gunnars Pálssonar, forstjóra Samkeppniseftirlitsins. Gangaöflun stendur þó enn yfir. Rannsóknin hófst fyrir tæpu ári síðan.

Að sögn Páls er stefnt að því að henni ljúki á fyrri hluta ársins.

Markaðsrannsókn er nýtt form rannsóknar og felur í sér athugun á því hvort grípa þurfti til aðgerða gegn aðstæðum eða háttsemi sem koma í veg fyrir, takmarka eða hafa skaðleg áhrif á samkeppni almenningi til tjóns.

Byggir rannsóknin á ákvæði samkeppnislaga sem heimilar Samkeppniseftirlitinu að grípa til ýmis konar aðgerða til að ryðja úr vegi samkeppnishindrunum, þótt þær stafi ekki af brotum á lögunum.

Samkeppniseftirlitið áætlar að íslensk heimili hafi keypt bensín og díselolíu fyrir um 42 milljarða króna á árinu 2011.

Í ljós hafi komið að verð á eldsneyti á Íslandi sé um 15 til 20 prósent hærra en vegið meðalverð í aðildarríkjum Evrópusambandsins.

Smæð og landfræðileg einangrun kunni að skipta máli þar og því mun mikilvægara sé að samkeppni sé ekki raskað vegna samkeppnishamlandi aðstæðna á markaðnum eða háttsemi þeirra fyrirtækja sem starfa á honum.

Álagning á bensíni hækkaði um 116 prósent á hvern lítra frá árinu 2005 til ársins 2013. Þetta kom fram á Vísi í gær.

Álagning á lítra var 17,50 krónur árið 2005 en 37,90 árið 2013. Álagning á dísilolíu hækkaði um 157 prósent eða úr 15,30 krónum á lítra í 39,30 krónur frá árinu 2005 til 2013. Á sama tímabili hækkaði vísitala neysluverð um 69 prósent.

Runólfur Ólafsson, framkvæmdarstjóri FÍB, segir olíumarkaðinn á Íslandi bera mjög sterk einkenni einsleitni og ljóst að íslenski olíumarkaðurinn sé fákeppnismarkaður.

„Það er líka einkennilegt að markaðurinn er orðinn að svo stórum hluta i eigu lífeyrissjóða. Samkeppniseftirlitið hefur kallað eftir því að það þurfi að skoða sérstaklega og setja upp einhverjar reglur. Það hlýtur að hafa áhrif að eignarhald sé orðið það svipað á milli samkeppnisfélaga,“ segir hann.