Áttatíu prósent fyrirtækja virk

Viðskiptahraðallinn Startup Reyjavík verður nú haldinn þriðja sumarið í röð en að honum standa í sameiningu Klak Innovit nýsköpunar- og frumkvöðlasetur og Arion banki.

„Markmiðið með Startup Reykjavík er að hraða ferlinu sem sprotafyrirtæki fara í gegnum þannig að þau nái að koma í verk á tíu vikum því sem annars tæki mánuði eða jafnvel ár,“ segir Stefán Þór Helgason, verkefnastjóri hjá Klak Innovit.

Tíu fyrirtæki taka þátt í Startup Reykjavík hverju sinni og stendur verkefnið yfir í tíu vikur. Fyrirtækin fá sameiginlega skrifstofuaðstöðu, aðstoð og leiðbeiningar frá tugum mentora auk þess sem Arion banki leggur hverju og einu fyrirtæki til 2 milljónir í hlutafé gegn 6 prósenta eignarhlut.

Hingað til hafa 20 fyrirtæki tekið þátt í Startup Reykjavík. Sextán þeirra eru ennþá virk, þrjú hafa verið sett í biðstöðu og eitt hefur hætt starfsemi. Hjá þessum fyrirtækjum vinna hátt í 70 manns í 49 fullum stöðugildum. Alls hefur verið fjárfest í þessum fyrirtækjum fyrir 60 milljónir króna og þau hafa hlotið styrki upp á 225 milljónir. Hluti styrkupphæðanna er háður framvindu verkefnanna.

„Startup Reykjavík er eitt af fáum afmörkuðum fjárfestingaverkefnum sem snúa að sprotafyrirtækjum en það er ljóst að þörfin fyrir verkefni af þessu tagi er mikil. Á milli tvö og þrjú hundruð hugmyndir og fyrirtæki sækja um inngöngu í Startup Reykjavík á hverju ári,“ segir Stefán.

Þær hugmyndir sem tekið hafa þátt í Startup Reykjavík eru fjölbreyttar. Má sem dæmi nefna viskíframleiðslu, hönnun og uppsetningu á sleðarennibraut niður Kambana, þróun og framleiðslu á sjálfvirkum lyfjaskammtara, fatahönnun, upplýsingar um söngtexta og gítargrip og margt fleira.

Öllum sem hafa snjalla hugmynd eða hafa stofnað fyrirtæki er frjálst að sækja um að taka þátt í Startup Reykjavík. Einfalt er að sækja um en það er gert rafrænt hér og umsóknarfrestur er til og með 30. mars 2014.