"Við syngjum ekkert bull“

„Það er alveg bullandi húmor í okkur, þetta verður mjög lifandi,“ segir Jón Svavar Jósefsson, stjórnandi Bartóna, karlakórs Kaffibarsins, en kórinn heldur sína fyrstu sumartónleika í kvöld í Tjarnarbíói.

„Við erum að bjóða vinum okkar sem við höfum sungið inn á plötur með að syngja með okkur,“ segir Jón Svavar en meðal þeirra tónlistarmanna sem koma fram í kvöld eru Emmsjé Gauti, Original Melody og Mike Lindsay en Bartónar hafa áður sungið bakraddir í lögum þeirra listamanna. „Við höfum verið að leggja meiri áherslu á sönginn í vetur,“ segir kórstjórnandinn.

„Fyrst vorum við bara að gera þetta á kúlinu, sem okkur fannst flottast þá en svo þroskast allir og kórinn hefur þroskast sem slíkur,“ segir Jón Svavar og bætir því við að kórmeðlimir séu orðnir mun betri söngvarar en þeir voru áður. „Við höldum samt öllu hinu, sviðsframkomu og okkar gleði.“

Syngja vísur sem höfða til kvenþjóðarinnar

Bartónar skera sig út frá öðrum hefðbundnum kórum á margan hátt en kórinn hefur meðal annars skapað sér siðareglur sem haldið er til haga.

„Við syngjum ekkert bull, við syngjum föðurlandslög og vísur sem höfða til kvenþjóðarinnar,“ segi Jón Svavar. „Við reynum að sneiða fram hjá trúarbrögðum og pólitík þótt það detti inn einstaka lög af því tagi,“ segir stjórnandinn en strákarnir syngja langmest íslenska karlakórstónlist undirleikslaust. „Við stólum bara á það að við skilum röddunum okkar nógu vel frá okkur.“

Allur ágóði af tónleikunum rennur beint til Stígamóta, samtaka gegn kynferðisofbeldi, en félögum kórsins er mjög annt um þeirra starf. „Þetta er eitthvað sem maður vill gefa gaum og taka þátt í að styðja við,“ segir Jón.

„Ef maður getur gert eitthvað í þágu samfélagsins þá er um að gera að gera það, þetta er spurning um málstað og að taka þátt í kærleikanum í samfélaginu.“

Tónleikarnir hefjast klukkan 20.00 í Tjarnarbíói og kostar 1.500 krónur inn.