Við getum gert betur!

Konur innan VR eru með 8,5% lægri laun en karlar í félaginu af þeirri ástæðu einni að þær eru konur. Staðan innan VR er þó skárri en hjá mörgum öðrum stéttarfélögum og hópum í þjóðfélaginu, laun kvenna eru víða mun lægri en karla án þess að hægt sé að skýra það á viðunandi hátt. Þetta á ekki að eiga sér stað í nútímaþjóðfélagi. VR hefur lengi lagt áherslu á baráttuna fyrir jafnrétti á vinnumarkaði, ekki bara vegna þess að í VR er meirihluti félagsmanna konur heldur af þeirri einföldu ástæðu að jafnrétti er sjálfsögð mannréttindi.

Minnkað um 40% frá 2000

Árangur af baráttu félagsins er sýnilegur og marktækur – kynbundinn launamunur innan VR hefur dregist saman um rúmlega 40% frá aldamótum. Árið 2000 var munurinn 15,3% en er í dag 8,5% eins og fyrr sagði. Það er sá munur sem eftir stendur þegar búið er að taka tillit til vinnutímans, starfsins og allra annarra þátta sem hafa áhrif á laun félagsmanna. En þetta er ekki nóg, það er enn munur á launum karla og kvenna sem ekki er hægt að skýra.

Ég hef áður bent á það sem VR hefur gert í þessari baráttu: Við höfum lagt áherslu á jafnrétti í kjarasamningum; við höfum skoðað stöðu kvenna sérstaklega í launakönnunum; við ruddum brautina fyrir nýjum fæðingarorlofslögum með því að greiða félagsmönnum laun í fæðingarorlofi; við höfum haldið námskeið og við höfum farið í herferðir svo ég nefni bara nokkur atriði.

Jafnlaunavottun VR

Við verðum alltaf að vera á tánum þegar kemur að jafnrétti. Aðgerðir síðustu ára hafa vissulega skilað okkur áleiðis - en þær hafa ekki dugað. Fyrir hálfu öðru ári kynntum við nýja nálgun, Jafnlaunavottun VR sem er rökrétt framhald af því sem við höfum verið að gera. Þar tökum við höndum saman með atvinnurekendum. Jafnlaunavottun VR er hagnýtt stjórntæki fyrir fyrirtæki til að tryggja að kynferði ráði engu um launaákvarðanir. Ég hvet fyrirtæki til að nýta sér Jafnlaunavottun VR – hún er fyrir öll fyrirtæki og opinberar stofnanir, burtséð frá því hvort starfsmennirnir eru í VR eða ekki.

Við viljum leggja áherslu á að unga fólkið komi inn á vinnumarkaðinn á jafnréttisgrundvelli. Hvernig gerum við það? Með því að fræða ungt fólk um þessi mál, eins og gert er í VR-Skóla lífsins sem félagið hleypti af stokkunum í lok september. Það gerum við einnig með því að fara í skólana og fjalla um jafnrétti samhliða réttindum og skyldum á vinnumarkaði, eins og VR hefur gert í tæpa tvo áratugi. Og það gerum við, hvert og eitt, í uppeldi barna okkar.

Horfum fram á veginn

Þann 24. október 1975 lögðu konur á íslenskum vinnumarkaði niður störf til að krefjast jafnréttis. Að við skulum enn vera að hamra á sömu kröfunum næstum fjórum áratugum síðar er algerlega óásættanlegt. Ég hef aldrei hitt neinn sem telur að það sé í lagi að greiða mismunandi laun fyrir sama starf. Hefur þú hitt einhvern slíkan?

Konur gegna jafnmikilvægu hlutverki í atvinnulífinu og karlar. Viðurkennum það í orði, sýnum það í verki og höldum áfram!