Kærir ákvörðun vegna virkjunar í Bjarnarflagi

Kristján Már Unnarsson skrifar 22. desember 2014 19:01

Landsvirkjun hefur kært ákvörðun Skipulagsstofnunar um að umhverfismat Bjarnarflagsvirkjunar þarfnist víðtækrar endurskoðunar. Landsvirkjun segir Skipulagsstofnun hafa hunsað álit Orkustofnunar og Umhverfisstofnunar og ætlar að láta reyna á hvort ákvörðun hennar eigi sér lagastoð og að gætt hafi verið meðalhófs.

Í Bjarnarflagi í Mývatnssveit er þegar starfandi elsta jarðgufuvirkjun landsins, frá árinu 1969, upp á þrjú megavött, en Landsvirkjun hefur lengi áformað að reisa þar aðra og mun stærri virkjun og lá fyrir umhverfismat frá árinu 2004. Lög gera ráð fyrir að tíu ára gamalt umhverfismat þurfi að endurskoða og hafði Landsvirkjun sjálf bent á að nokkrir þættir væru vanreifaðir í fyrra mati, eins og áhrif virkjunar á grunnvatn og loftgæði og líkur á smáskjálftum vegna niðurdælingar.

Skipulagsstofnun ákvað hins vegar í síðasta mánuði að krefjast mun víðtækari endurskoðunar á umhverfismatinu og eru helstu rök hennar þau að forsendur hafi breyst verulega í ljósi reynslu af rekstri annarra jarðvarmavirkjana; breytingar hafi orðið á reglum um loftgæði og lögum um verndun Mývatns og Laxár; ferðamannastraumur hafi stóraukist á áhrifasvæði Bjarnarflagsvirkjunar; og Mývatnssvæðið sé skráð sem eitt af þremur Ramsarsvæðum á Íslandi.

Landsvirkjun segir á móti að Skipulagsstofnun hafi ekki tekið tillit til umsagna Orkustofnunar, Umhverfisstofnunar og fleiri aðila, sem ekki töldu að verulegar breytingar hefðu orðið á forsendum; ekki hafi verið tekið tillit til þess að virkjunin var minnkuð úr 90 MW niður í 45 MW; þetta sé verulega íþyngjandi stjórnvaldsákvörðun, sem kalli á mjög kostnaðarsama og umfangsmikla endurskoðun; og það sé skilyrði í stjórnsýslurétti að íþyngjandi ákvarðanir eigi sér skýra lagastoð og að gætt sé meðalhófs.

Landsvirkjun hefur því kært ákvörðun Skipulagsstofnunar til úrskurðarnefndar umhverfis- og auðlindamála. Það sé gert í ljósi þess að þetta er í fyrsta sinn sem reynir á ákvæði um endurskoðun tíu ára gamals umhverfismats, þess fordæmis sem niðurstaðan gæti skapað, svo og þeirra hagsmuna Landsvirkjunar sem eru í húfi.

Tengdar fréttir

Allar líkur sagðar á nýju umhverfismati

Skipulagsstofnun vill að umhverfismat Bjarnarflagsvirkjunar verði endurgert. Forstjóri Landsvirkjunar telur allar líkur á því að ráðist verði í þá vinnu enda svæðið í nýtingarflokki. Landvernd fagnar áfangasigri og segir sýn félagsins staðfesta.

12. nóvember 2014 07:00

Mývatn sagt eiga að njóta vafans

Skorað er á umhverfis- og auðlindaráðherra að taka Bjarnarflagsvirkjun úr nýtingarflokki rammaáætlunar um vernd og nýtingu orkunýtingu landsvæða í ályktun aðalfundar Fjöreggs, félags um náttúruvernd og heilbrigt umhverfi í Mývatnssveit.

1. apríl 2014 07:00

Telur Bjarnarflagsvirkjun ekki ógna lífríki Mývatns

Forstjóri Landsvirkjunar segir unnt að reisa Bjarnarflagsvirkjun án þess að lífríki Mývatns sé á nokkurn hátt stefnt í hættu. Hann útilokar ekki nýtt umhverfismat en segir að allar athugasemdir hafi legið fyrir þegar Alþingi samþykkti virkjunina fyrir þremur mánuðum. Mótmæli náttúruverndarsamtaka gegn Bjarnarflagsvirkjun hafa verið áberandi frá því í haust en þrátt fyrir þau samþykkti Alþingi rammaáætlun í janúar þar sem grænt ljós var gefið á þessa umdeildu virkjun.

19. apríl 2013 21:00

Leggjast ekki gegn Bjarnarflagsvirkjun

Aðalfundur Veiðifélags Mývatns felldi tillögu um að skorað yrði á sveitarstjórn Skútustaðahrepps að veita ekki frekari leyfi til framkvæmda við Bjarnarflagsvirkjun.

21. febrúar 2014 10:30

Landvernd krest þess að hætt verði við Bjarnarflagsvirkjun

Aðalfundur Landverndar, sem var haldinn í Reykjavík í dag, hvetur stjórn Landsvirkjunar og sveitarstjórn Skútustaðahrepps til að hlífa lífríki Mývatns við auknu álagi sem mun fylgja fyrirhugaðri Bjarnarflagsvirkjun við Mývatn.

14. apríl 2013 16:40