Frelsissvipting í Hlíðunum: Einn neitaði sök, annar fékk frest og þriðji mætti ekki

Davíð Fjeldsted (áður Davíð Freyr Rúnarsson) neitaði sök í frelsissviptingarmáli sem þingfest var í Héraðsdómi Reykjavíkur í morgun. Ríkharð Júlíus Ríkharðsson mætti ekki í þingfestinguna og félagi þeirra, sem ekki hefur áður hlotið dóm, óskaði eftir fresti til að taka afstöðu til ákærunnar. Málinu var frestað til 7. janúar.

Síbrotamennirnir og meðlimir Black Pistons vélhjólagengisins Ríkharð Júlíus og Davíð Feru ásamt þriðja manni ákærðir fyrir sérstaklega hættulega líkamsárás, hótanir og frelsissviptingu í desember 2010.

Þremenningunum er gefið að sök að hafa fimmtudaginn 19. desember 2010 í bakherbergi á veitingastaðnum Monte Carlo við Laugaveg í Reykjavík veist að öðrum karlmanni á fertugsaldri og krafið hann um peninga, slegið og sparkað ítrekað í höfuð og líkama hans og svipt hann frelsi sínu í því skyni að þvinga hann til að láta fé af hendi.

Slógu hann ítrekað og helltu upp í hann þvottaefni

Í ákærunni segir að þeir hafi síðan flutt manninn í íbúð í Hlíðahverfi í Reykjavík þar sem þeir slógu hann ítrekað með hnefum, hnúajárnum, kylfu og helltu upp í hann þvottaefni.

Þá hafi þeir brennt hann með sígarettu og hótað að klippa af honum fingur og eyru. Á meðan þessu stóð hafi þeir afklætt manninn og haldið honum fjötruðum og kefluðum yfir nótt í baðkeri í íbúðinni.

Hótuðu að nauðga systur hans

Maðurinn var látinn laus síðdegis 20. desember eftir að faðir hans samþykkti að leggja eina milljón króna inn á bankareikning eins ákærða. Áður en hann var látinn laus hótuðu þremenningarnir honum að ef hann kærði brotin til lögreglu yrði honum og fjölskyldu gert mein. Þar á meðal að honum og systur hans yrði nauðgað.

Af árásinni hlaut maðurinn mar á öxl á upphandlegg, yfirborðsáverka á bakvegg brjóstkassa, brunaáverka á höfði og hálsi, þrjú hringlaga brunasár á aftanverðum hálsi, marga yfirborðsáverka á hálsi, mar á olnboga og yfirborðsáverka á öðrum hlutum höfuðs og mar á hægra auga.

Ríkharð og Davíð voru árið 2011 dæmdir í fangelsi, meðal annars fyrir hrottafengna líkamsárás og frelsissviptingu á hendur tvítugum manni.  Davíð var dæmdur í þriggja ára fangelsi og Ríkharð í þriggja og hálfs árs fangelsi. Þá var Ríkharð einnig dæmdur í tveggja ára fangelsi fyrir að hafa kveikt í íbúðarhúsi  að Kleppsvegi 102.