Andalifur af matseðli Fabrikkunnar

Jóhannes Ásbjörnsson, sölu- og markaðsstjóri Hamborgarafabrikkunnar, segir góðar ábendingar viðskiptavina og litla sölu andalifrar hafa orðið til þess að varan hafi verið tekin af matseðli staðarins. Stjórnarmaður í Velbú, samtökum um velferð í búskap, fagnar ákvörðuninni en telur að hún byggi fremur á dræmri sölu en siðferðilegum sjónamiðum.

Sæunn Ingibjörg Marinósdóttir hvatti Fabrikkuna til þess að „hætta að taka þátt í einu hörmulegasta dýraníði veraldar og taka Foie Gras af matseðlinum“. Vísaði hún á umfjöllun um umdeildar aðferðir við framleiðslu andalifrar.



„Frönsk andalifur er vissulega mjög umdeilt hráefni og það vissum við þegar við tókum það inná matseðil hjá okkur á sínum tíma. Ástæðan var sáraeinföld: Pörun nautakjöts og andalifrar er vinsæl og algeng á veitingastöðum víðsvegar um heiminn,“ sagði Jóhannes í svari á Facebook-síðu Fabrikkunnar í gær.

Sjá einnig: 40 milljónir andarunga kramdir lifandi árlega

Hann bætti hins vegar við að í ljósi góðra ábendinga frá viðskiptavinum, og eins sökum þess að andalifrin selst lítið á Fabrikkunni, hefði verið ákveðið að taka hana af matseðlinum.

„Það er vissulega svo að mörg sjónarmið eru uppi um allan heim sem tengjast framleiðsluaðferðum á ýmiskonar matvælum. Við sem framreiðum mat getum ekki annað en staðið við val okkar á hráefnum, en að sama skapi reynt að vera opnir og móttækilegir fyrir ábendingum viðskiptavina okkar. Þannig höfum við starfað fram að þessu og munum gera áfram,“ segir Jóhannes.

Guðný Nielsen, stjórnarmaður í Velbú, fagnar ákvörðuninni í samtali við RÚV en hvetur Fabrikkumenn til að kynna sér hvernig framleiðsla andlifrar sé háttað í heiminum. Geri þeir það verði þeir vafalítið stoltir af ákvörðun sinni.

Post by Sæunn Ingibjörg Marinósdóttir.