Hringdu lokar á Deildu

Héraðsdómur Reykjavíkur ákvað í október að leggja fram fyrir Sýslumanninn í Reykjavík að leggja lögbann á fjarskiptafyrirtækin geti veitt viðskiptamönnum sínum aðgang að vefsíðunum www.deildu.net, www.deildu.com, www.thepiratebay.se, www. thepiratebay.sx og www.thepiratebay.org.

Í tilkynningu frá fjarskiptafyrirtækinu Hringdu kemur fram að fyrirtækið mun verða að beiðni Sýslumannsins og loka á téðar síður. Frá deginum í dag mun Hringdu loka fyrir síðurnar.

„Frá upphafi þessa máls hefur Hringdu mótmælt kröfum STEF enda telur fyrirtækið það ekki hlutverk fjarskiptafyrirtækja að ritskoða netumferð viðskiptavina sinna og benti m.a. á í málsvörn sinni að aðgangur að veraldarvefnum er skilgreindur sem grundvallarmannréttindi í tilskipun nr. 2009/140/EB hjá Evrópusambandinu,“ segir í tilkynningunni frá Hringdu.

Fyrirtækið heldur því fram að réttast hefði verið af STEF að beina lögbannskröfum sínum að rekstraraðilum ThePirateBay og Deildu.net í stað Hringdu og annarra fjarskiptafyrirtækja.

„Á það var einnig bent að margar aðrar sambærilegar vefsíður séu starfandi sem ekki var krafist lögbanns á og að öllum mögulegum hindrunum yrði auðvelt að komast framhjá.“

„Að okkar mati er þetta lögbann algjörlega tilhæfislaust og í raun beiðni um ritskoðun á internetinu. Niðurstaðan er íslenskum neytendum verulegt áhyggjuefni og gæti gefið fordæmi fyrir frekari ritskoðun internetsins” segir Kristinn Pétursson, forstöðumaður sölu- og þjónustusviðs, Hringdu.

Hringdu telur að mikilvægt sé að að höfundarréttur sé virtur en þetta sé ekki rétta leiðin.

„Áætlað er að 20.000 heimili kaupi sér áskrift að Netflix og að hátt í 8.000 einstaklingar séu með áskrift að Spotify. Það segir okkur að Íslendingar vilja greiða fyrir afþreyingu. Á endanum snýst þetta allt um aðgengi,” bætir Kristinn við að lokum.