Finnar hrifnir af Málmhaus

Finnar eru yfir sig hrifnir af myndinni Málmhaus eftir Ragnar Bragason.

Myndin er nú sýnd á Helsinki International Film Festival og hefur verið valin til áframhaldandi sýninga í öðrum borgum Finnlands.

Þessu segir Ragnar frá á Facebook-síðu sinni. „Nýja uppáhalds þjóðin mín," skrifar leikstjórinn á síðuna sína.

Finnar hafa löngum verið þekktir fyrir mikinn þungarokksáhuga og því kannski ekki skrítið að myndinni sé vel tekið enda fjallar hún um unga stúlku sem finnur sáluhjálp í þungarokki eftir að bróðir hennar lést í hörmulegu slysi.

Myndin hér að ofan var tekin á forsýningu Málmhaus í Háskólabíó í október 2013.