Ömmur og afar „tagga" óvart Grandmaster Flash á Facebook

Nafn rapparans Grandmaster Flash er nú farið að birtast undir kveðjum frá ömmum og öfum á Facebook. Málið hefur vakið svo mikla athygli að sérstök vefsíða er farin að halda utan um þessar rafrænu uppákomur.

Ástæðan er einföld: Þegar fólk skrifar stöðuuppfærslur á Facebook fær það oft tillögur að nöfnum til „tagga“ í stöðuuppfærsluna. Tillögurnar koma upp þegar ákveðinn stafafjöldi af nafni einstaklings liggja fyrir. Orðið amma á ensku er Grandma og sumar ömmur hafa þannig fengið tillögu að „tagga“ Grandmaster Flash og óvart samþykkt þá tillögu.

Grandmaster Flash er talinn einn af frumkvöðlum rapptónlistarinnar og hip-hop menningarinnar. Hann var hluti sveitarinnar Grandmaster Flash and the Furious Five. Lagið þeirra The Message er með þeim þekktari í rappsögunni, en það kom út árið 1982. Texti lagsins lýsir aðstæðum í fátækrahverfum stórborga í Bandaríkjunum á níunda áratug síðustu aldar.

Hér að neðan má sjá nokkur skjáskot frá ömmum og öfum heimsins, þar sem Grandmaster Flash fær að vera með.