Baneitraðir bræður á Blásteini

„Ótrúlega fróðir og grjótharðir, þeir bræður,“ segir Ragnar Gunnarsson, alías Raggi Sót, sem hafði veg og vanda að spurningakeppninni sem haldin er reglulega á Blásteini í samstarfi við vin sinn og félaga: Jón Hauk Brynjólfsson, en saman kallar tvíeykið sig J Brynjólfsson og Sót.

Ragnar, sem þekktur er meðal annars sem forsöngvari hinna fornfrægu Skriðjökla frá Akureyri, segir að umfangsmikil vitneskja þeirra bræðra hafi komið sér í opna skjöldu, en það voru sem sagt þeir bræður Brynjar Níelsson alþingismaður og Gústaf Níelsson framkvæmdastjóri, sem fóru með sigur af hólmi í keppni sem haldin var á laugardaginn síðasta. „Þetta eru náttúrlega langskólagengnir menn og bókaormar. Það eru kannski ekkert allir sammála mér um að hann Gústi sé voðalega klár náungi, það verður nú að viðurkennast. Ég held að Brynjar sé þokkalega vel gefinn. Baneitraðir bræðurnir, jájá...“ segir Raggi.

Skorradals-Álfurinn í öðru sæti

Raggi kemur því að í óspurðum fréttum að næsta keppni verði laugardaginn 4. október. „Ég veit ekki hvort er uppselt. Slík er ásóknin í þetta. Frábær verðlaun og þess má geta að í öðru sæti varð hann Eyjólfur vinur minn Engilbertsson frá Vatnsenda í Skorradal. Oft nefndur Skorradalsálfurinn.“

Til stóð að 1. verðlaun gæfu heila 30 bjóra í verðlaun en þá kom jafnaðarmaðurinn upp í Ragnari. „Já, þetta áttu að vera 30 bjórar, bjórkort sem Blásteinn gefur sérstaklega út, en þar sem þeir eru nú báðir í fullri vinnu, Brynjar alþingismaður og lögmaður og á skítnóg af peningum og Gústi náttúrlega framkvæmdastjóri hjá Iðnaðarþrifum Bergþóru, stöndugir og vel efnaðir ákvað ég að hafa þetta bara 15 bjóra í 1. verðlaun en 30 í önnur verðlaun. Því Skorradalsálfurinn er bara á einhverjum gamlingjabótum sem hrökkva engan veginn til hjá alvöru drykkjumönnum.“

Fátt eitt stóð í bræðrunum gáfuðu

Svo virðist sem ekki fari mikið fyrir kvenfólki í þessu samhengi og Ragnar segir það rétt, en þá aðeins akkúrat þar og þá. „Það hefur nú verið meira, sennilega hefur verið Kvennakvöld hjá Fylki þetta kvöldið, en stundum verður ekki þverfótað fyrir kvenfólki þarna.“

Raggi bar upp hinar erfiðustu spurningar en þær stóðu ekki í bræðrunum gáfuðu. Spyrillinn man þó eftir einni spurningu sem þeir götuðu á, af hverju læðast Hafnfirðingar fram hjá apótekinu? „Til að vekja ekki svefnpillurnar. Þetta átti nú að vera auðveldasta spurningin en líklega lærir þú þetta ekki í Háskólanum.“