Barcelona gæti klárað kaupin á Suárez fyrir vikulok

Luis Suárez gæti orðið leikmaður Barcelona um helgina, samkvæmt heimildum fréttastofu Sky Sports, en forráðamenn félaganna hafa átt í viðræðum undanfarna daga.

Ekkert er eftir nema semja um kaupverðið á kappanum. Liverpool vill fá 80 milljónir punda fyrir úrúgvæska markahrókinn en Barcelona er sagt vilja greiða nær 60 milljónum.

Börsungar bera fyrir sig að Suárez megi ekki spila fyrr en í nóvember vegna leikbannsins fræga, en Liverpool-menn ætla ekki að gefa neinn afslátt af sínum besta manni.

FIFA er búið að staðfesta að félagaskiptin megi ganga í gegn þó leikmaðurinn sé í banni, en hann má ekki koma nálægt fótbolta næstu fjóra mánuðina eftir að bíta Giorgio Chiellini, leikmann Ítalíu, á HM.

Luis Suárez varð markakóngur ensku úrvalsdeildarinnar á síðustu leiktíð þegar hann skoraði 31 mark í 33 leikjum. Hann var kjörinn besti leikmaður deildarinnar af leikmönnum og blaðamönnum. Hann hefur í heildina skorað 69 deildarmörk í 110 leikjum fyrir Liverpool síðan 2010.