Vildi ekki gifta sig áður en hún kynntist Ashton

Leikkonan Mila Kunis er í einlægu viðtali við tímaritið W og talar mikið um unnusta sinn, leikarann Ashton Kutcher, og barnið sem hún ber undir belti en þau Ashton eiga von á sínu fyrsta barni.

„Mig langaði aldrei að gifta mig. Ég bjó foreldra mína undir það frá tólf ára aldri. Síðan breyttist allt - ég fann ástina í lífi mínu. Núna lít ég svona á hjónaband: Ekki bjóða neinum. Gerið þetta í laumi. Foreldrar mínir eru sáttir við það. Þeir eru bara spenntir yfir því að ég sagði já,“ segir Mila. Leikkonan er líka spennt fyrir því að giftast Ashton.

„Við verðum öll skotin í kvikmyndastjörnum. Ég er að giftast manninum sem ég varð skotin í,“ bætir Mila við en Ashton er einnig fyrsti maðurinn sem hún kyssti á ævinni. Þau kynntust nefnilega þegar þau léku saman í sjónvarpsþættinum That ´70 Show árið 1998. Þá var hún 14 ára og hann 15 ára. 

„Fyrsti alvöru kossinn minn í lífinu var með honum í þættinum.“

Nú eru Ashton og Mila í óðaönn að undirbúa komu frumburðarins.

„Mig hefur aldrei langað til að vera manneskja sem er með bransann á heilanum. Fyrir mér hefur þessi vinna alltaf verið áhugamál sem breyttist í æðislega atvinnu. En ég lifi ekki fyrir leiklist. Ég er viss um að Meryl Streep lítur á leiklist öðruvísi. En ég er spennt fyrir því að verða móðir í fullu starfi.“