Fatastærðin 000 kynnt til sögunnar

Tímaritið Grazia fjallar um nýtt trend í Hollywood í nýjasta tölublaði sínu sem þeir nefna „The rise of the triple zero“ eða upprisu fatastærðarinnar 000. 

Þar er farið yfir stjörnur sem hafa grennst gríðarlega hratt og mikið á undanförnum mánuðum. Sú þróun þykir afturhvarf til fortíðar. 

„Það leit út fyrir að stærð núll heyrði sögunni til og stjörnur á borð við Beyonce, Rihanna og Daisy Lowe hefðu tekið við keflinu sem fyrirmyndir. En þrátt fyrir vinsældir þeirra þá á sér stað hættuleg þróun í Hollywood þar sem bandarískir fataframleiðendur finna sig knúna til að minnka minnstu stærðina niður í 000," segir ritstjóri Grazia, Jane Bruton.

Átta ár eru síðan tímaritið Grazia skrifaði samskonar grein er þeir fjölluðu um stærðina 00 og þótti flestum nóg um þá. Síðan hefur jákvæð þróun átt sér stað með heilbrigða ræktun líkama og sálar í forgrunni og fjölmiðlar hafa talað um „strong is the skinny“. 

Einkaþjálfarinn James Duigan er meðal viðmælenda blaðsins í greininni þar sem hann kennir meðal annars sjálfsmyndaæðinu (e.selfie) um þessa þróun í öfuga átt.

„Sjálfsmyndaæðið hefur magnað þetta upp hjá stjörnunum sem birta myndir af sér á samskiptamiðlum þar sem rifbeinin sjást. Oftast eru þær að draga inn andann og láta sig þannig vera mjórri á myndunum. Það gefur þeim aukna athygli sem þær þrífast á.“

 

Meðal þeirra sem hafa verið gagnrýndar undanfarna mánuði fyrir óheilbrigt holdarfar eru stjörnur á borð við Kate Bosworth, Nicole Richie, Julia Bowen úr Modern Family og Alexa Chung 

Það er vonandi að umfjöllunin í Grazia veki athygli og að fatastærðin 000 verði ekki eftirsóknarverð meðal almennings.