Hallgrímur herjar á Danmörku

„Ég skrifaði þetta upphaflega fyrir Balta og byrjaði á því árið 2001, en svo fór hann að gera myndir í Hollywwod og svona. Þá fór handritið aftast í röðina,“ segir höfundurinn Hallgrímur Helgason, en þessa dagana standa yfir í Kaupmannahöfn, tökur á kvikmyndinni Comeback sem gerð er eftir handriti Hallgríms.

Um er að ræða fyrsta frumsamda kvikmyndahandrit Hallgríms, að gamanmynd með dramatísku ívafi og fjallar það um uppistandara sem lendir í krísu. Uppistandarinn er á niðurleið sem reynir að fá feril sinn í gang á ný um leið og hann er neyddur til að endurnýja kynni við táningsdóttur, sem hann hafði nánast gleymt að hann ætti. „Þetta er kannski pínu byggt á eigin reynslu en á þessum tíma var ég búinn að prófa að vera uppistandari og átti líka táningsdóttir,“ bætir Hallgrímur við og hlær.

Hallgrímur segist þó ekki vera svekktur út í Baltasar fyrir að nota ekki handritið sitt. „Ég er ekki brjálaður út í hann. Hann er með mörg járn eldinum. Ég er bara glaður að það sé einhver að gera þetta.“

Framleiðandi myndarinnar er Morten Kaufmann. „Ég kynntist Morten Kaufmann fyrir um fjórum árum í Danmörku og þá fóru hjólin að snúast.“ Kaufmann hefur lengi unnið með leikstjóranum Thomas Vinterberg og gert með honum kvikmyndir eins og Jagten, Submarino og Festen.

Upphaflega var handritið skrifað á ensku en nú hefur því verið snúið á dönsku og heimfært upp á danskan veruleika af leikstjóranum Natöshu Arthy og uppistandaranum Jacob Tingleff.

„Það kom aldrei til greina að íslenska myndina því uppistandsmarkaðurinn á Íslandi er svo lítill. Danski uppistandsmarkaðurinn er mun líkari þeim bandaríska,“ segir Hallgrímur.

Aðalhlutverkið leikur Anders W. Berthelsen sem þekktur er fyrir myndir eins og Superclásico, Ítalska fyrir byrjendur og Mifune. Meðal annara leikara eru Peder Thomas Pedersen, Benedikte Hansen, sem kunn er fyrir hlutverk sitt í Borgen, Sara-Sofie Boussnina og Filippa Suensson. Leikstjóri er Natasha Arthy og er þetta hennar fjórða mynd í fullri lengd.

Áætlað er að myndin verði frumsýnd í upphafi árs 2015.