Alfreð hefur áhyggjur af Hamburg

Alfreð Gíslason, þjálfari Kiel, segir að það væri slæmt að missa Hamburg úr þýsku úrvalsdeildinni.

Gjaldþrot blasir við félaginu eftir að forsetinn Andreas Rudolph steig frá borði fyrr í vetur og þá hefur félagið ekki fengið keppnisleyfi fyrir næsta tímabil.

„Það væri mikill harmleikur fyrir handboltann ef félagið myndi hætta störfum í Hamburg,“ sagði Alfreð í samtali við þýska fjölmiðla en liðið varð Evrópumeistari í fyrra.

„Við þurfum Hamburg. Bæði sem deild og líka sem félag [Kiel]. Góð samkeppni gerir lið betri og er holl fyrir allar íþróttir. Leikir tveggja stórliða eru einnig stórskemmtilegir,“ sagði Alfreð.

Um 415 milljónir króna vantar upp á hjá Hamburg til að félagið fái keppnisleyfi fyrir næsta tímabil og geti þannig starfað áfram. Þar á bæ eru menn enn ekki búnir að gefa upp vonina um það takist.