Bjarni Ben: ESB sýndi stífleika og sló fyrri tillögur um eftirlit út af borðinu

Fjármálaráðherra segir að tillaga um nýtt fjármálaeftirlit á vettvangi EFTA-ríkjanna gæti leyst þann stjórnskipulega vanda sem fylgir bankaeftirliti Evrópusambandsins. Hann segir að Evrópusambandið hafi sýnt of mikinn stífleika á fyrri stigum málsins.

EFTA-ríkin Ísland, Noregur og Liechtenstein eiga nú í viðræðum við Evrópusambandið um tillögu um nýtt EFTA-fjármálaeftirlit. Tilgangur þess væri að sinna yfirþjóðlegu fjármálaeftirliti sérstaks eðlis og kæmi í stað hins yfirþjóðlega fjármálaeftirlits á vettvangi European Banking Authority, EBA, eins og við greindum frá í gær.

„Það hafa allnokkrar hugmyndir verið lagðar á borð framkvæmdastjórnar Evrópusambandsins en þær hafa ekki orðið grunnur að lausn. Enn ein tillagan liggur hjá þeim núna og það er ríkur vilji hjá EFTA/EES-ríkjunum að finna ásættanlega lausn fyrir alla aðila. Mér hefur þótt sem Evrópusambandið hafi sýnt of mikinn stífleika í þessu máli,“ segir Bjarni Benediktsson fjármálaráðherra.

Málið er risavaxið því það snýst um grundvallarspurningar um EES-samninginn og framtíð bankaeftirlits í Evrópusambandinu. Fjármálastarfsemi fellur undir innri markað ESB og því hefðu EFTA-ríkin þurft að innleiða tilskipun um hið sameiginlega fjármálaeftirlit ESB. Fréttablaðið greindi frá því í burðarfrétt á forsíðu í maí 2012 að tilskipun um þetta yfirþjóðlega valdframsal, sem fælist í tilskipun um yfirþjóðlegt fjármálaeftirlit ESB, stæðist ekki íslensku stjórnarkrána. Nú er komin lausn á þessu á vettvangi EFTA-ríkjanna sem liggur á borði framkvæmdastjórnar Evrópusambandsins.

„Hér er verið að reyna að smíða lausn sem myndi með einhverjum hætti tengjast þeim vettvangi sem við höfum komið upp í samstarfi við aðra á EES-svæðinu. Meginatriðið í þessu er að við ætlum ekki að framselja vald til stofnunar sem Ísland á ekki aðild að (European Banking Authority innsk.blm),“ segir Bjarni.

Sérstök nefnd í fjármálaráðuneytinu undir forystu Tómasar Brynjólfssonar fer nú með málið en Skúli Magnússon, héraðsdómari og fyrrverandi ritari EFTA-dómstólsins er í nefndinni.

Fyrir liggja minnisblöð um að tillagan um þessa nýju stofnun, þ.e. sérstakt EES/EFTA-fjármálaeftirlit feli ekki í sér valdframsal af sambærilegu tagi og þeim völdum sem fjármálaeftirlit Evrópusambandsins hefði væri tilskipunin um það innleidd í íslenska löggjöf óbreytt.