Félag markaðsgreinenda var stofnað á fundi í Reykjavík í dag. Tilgangur félagsins samkvæmt lögum þess er að vera faglegur vettvangur fyrir fagfólk og áhugamenn á sviði tæknigreiningar (e. technical analysis), atferlisfjármála (e. behavioral finance), megindlegrar greiningar (e. quantitative analysis) og reiknanlegra fjármála (e. computational finance).
Þá er félaginu jafnframt ætlað að vera vettvangur skoðanaskipta og reynslusagna á þessum sviðum og stuðla að aukinni umræðu, fræðslu, skilningi og eflingu á meðal félagsmanna sinna og innan fjármálastofnana, fjárfesta, háskóla og fjölmiðla. Félagið er ekki rekið í ágóðaskyni.
Í tilefni af stofnun félagsins og til minningar um föður sinn færðu börn Þorkels Valdimarssonar, þau Valdimar og Sigríður Elín, félaginu að gjöf enskt bókasafn hans með 315 bókum um tæknigreiningu og viðskiptaleg málefni. Þorkell lést fyrr á þessu ári, en hann var mikill áhugamaður um tæknigreiningu sem hlutabréfamiðlari og fjárfestir í meira en hálfa öld.
Þá flutti Gylfi Magnússon dósent við Viðskiptafræðideild HÍ erindi og svaraði fyrirspurnum um rannsóknir sínar á sviði atferlisfjármála við góðar undirtektir viðstaddra.
VÍB eignastýringarþjónusta Íslandsbanka, hýsti fundinn á Kirkjusandi.
Fyrstu stjórn félagsins skipa:
Yngvi Harðarson, framkvæmdastjóri Analytica - formaður
Ármann Einarsson, sjóðstjóri hjá Íslandssjóðum - viðtakandi formaður
Sigurður B. Stefánsson, fjárfestingastjóri hjá eignastýringu Landsbankans
Svandís R. Ríkarðsdóttir, sjóðstjóri hjá eignastýringu Landsbankans
Valdimar Þorkelsson, sérfræðingur, greiningarsviði Fjármálaeftirlitsins
Stefnt er að almennum félagsfundi í byrjun júní en hann verður kynntur sérstaklega af félaginu.
Stofnfundur Félags markaðsgreinenda
