Töframaðurinn bara í heimsókn hjá Ferrari

Ross Brawn, fyrrverandi liðsstjóri Ferrari á gullaldarárum liðsins í Formúlu 1, heimsótti verksmiðju liðsins í Maranello á mánudaginn en segist þó ekki vera að snúa aftur til sinna gömlu félaga.

Heimsóknin hefur leitt til sögusagna um að Brawn gæti hafið aftur störf hjá Ferrari en liðið hefur farið skelfilega af stað á tímabilinu og gengur lítið að gera bílinn samkeppnishæfan eftir róttækar reglubreytingar.

„Ég var bara með vinahópnum á ferð um Ítalíu,“ segir Brawn í viðtali við íþróttablaðið Gazetta Dello Sport en Brawn yfirgaf stöðu sína sem liðsstjóri Mercedes í desember á síðasta ári.

Ferrari er sagt áhugasamt um að fá Brawn aftur til starfa en með hann í brúnni varð Ferrari sex sinnum heimsmeistari bílasmiða í röð og þá hjálpaði hann Michael Schumacher að verða heimsmeistari ökuþóra fimm ár í röð.

Brawn, sem stundum er kallaður töframaðurinn, keypti svo Honda-liðið og breytti því í Brawn GP árið 2009. Þar smíðaði hann ótrúlegan bíl sem Bretinn Jenson Button varð heimsmeistari á sama ár.