Innlent

„Óásættanlegt að samgöngum sé stefnt í voða“

Stefán Árni Pálsson skrifar
visir/stefán
Samtök ferðaþjónustunnar lýsa yfir verulegum áhyggjum vegna yfirstandandi verkfallsaðgerða flugvallarstarfsmanna Isavia í fréttatilkynningu sem samtökin hafa sent frá sér.

Þar kemur fram að deilan hafi ekki enn verið leyst og hafa aðgerðir flugvallarstarfsmanna nú þegar haft áhrif á þúsundir farþega.

„Ferðaþjónustan er afar viðkvæm fyrir truflunum sem þessum og eru ferðaskipuleggjendur erlendis nú þegar alvarlega að íhuga að hætta við ferðir með hópa sína til landsins á næstu dögum og vikum. Þá er ímynd og orðspor Íslands sem ferðamannastaðar í mikilli hættu. Öruggar samgöngur til og frá landinu er eitthvað sem verður að vera hægt að treysta á.“

Í tilkynningunni segir að á síðasta ári hafi ferðaþjónustan verið stærsta útflutningsatvinnugrein landsins og námu gjaldeyristekjur hennar 274 milljörðum króna.

„Þá hlaupa beinar og óbeinar skatttekjur á tugum milljarða. Því er ljóst að fjárhagslegt tjón fyrir þjóðarbúið getur orðið gífurlegt á degi hverjum ef deiluaðilar ná ekki saman á næstu dögum vegna aflýsingar á flugi eða að hætt sé við ferðir.“

Samtök ferðaþjónustunnar hvetja samningsaðila til að leita allra leiða til að ná sáttum í deilunni.

„Ábyrgð þeirra er mikil, enda er flug aðal samgöngumáti ferðamanna til og frá landinu. Óásættanlegt er að almennum samgöngum sé stefnt í voða með þessum hætti. Samtök ferðaþjónustunnar treysta því að samningar náist fyrir miðvikudaginn 30. apríl n.k, þannig að ekki komi til frekari aðgerða af hálfu flugvallarstarfsmanna Isavia.“

Ótímabundið allsherjarverkfall flugvallastarfsmanna hefst 30. apríl, ef ekki hefur samist fyrir þann tíma.


Tengdar fréttir

Allar líkur á töfum á millilandaflugi á morgun

Samninganefnd þriggja stéttarfélaga hefur skoðað tilboð Ísavia um helgina og gerðu samninganefnd Samtaka atvinnulífsins gagntilboð í dag. Skæruverkfall hefst að öllum líkindum kl 4 í fyrramálið.

Icelandair breytir áætlun sinni á Bandaríkjaflugi

Flugfélagið Icelandair hefur breytt áætlun allra flugvéla sem fara frá Bandaríkjunum í kvöld og allra flugvéla sem eru í áætlun 23.apríl vegna verkfalls starfsmanna Isavia á Keflavíkurflugvelli.

Flugvallarstarfsmenn með hálfa milljón á mánuði

Framkvæmdastjóri Samtaka atvinnulífsins segir að flugvallarstarfsmenn séu með um hálfa milljón í mánaðarlaun. Hann segir þá krefjast 26 prósenta hækkunar á launum sem komi ekki til greina að semja um.

Fimm milljón farþegar um Keflavík eftir fimm ár

Friðþór Eydal upplýsingafulltrúi segir Ísavia ætla að fjárfesta fyrir um 9 milljarða á næstu tveimur árum til að mæta gífurlegri fjölgun farþega um Keflavíkurflugvöll.

Vonast eftir niðurstöðu í dag

Samninganefndir Isavia og Félags flugmálastarfsmanna ríkisins sitja sáttafund og freista þess að afstýra vinnustöðvun í nótt.

Önnur vinnustöðvun flugvallastarfsmanna hófst í nótt

Boðuð fimm klukkustunda vinnnustöðvun flugvallastarfsmanna hófst klukkan fjögur í nótt og er búist við mikilli örtröð í Leifsstöð um og upp úr klukkan níu, þegar innritun farþega getur loks hafist, ásamt innvigtun farangurs og vopnaleit.

Viðræðum frestað um óákveðin tíma

Samkomulag náðist ekki í kjaraviðræðum flugvallastarfsmanna hjá sáttasemjara í dag. Mikið ber á milli samningsaðila og hefur Ríkissáttasemjari frestað viðræðum um óákveðin tíma.

Verkfall flugvallarstarfsmanna skellur á í nótt

Fimm tíma skæruverkfall flugvallarstarfsmanna skellur á snemma í fyrramálið með tilheyrandi töfum á millilandaflugi en þetta staðfesti Kristján Jóhannsson formaður Félags flugmálastarfsmanna í samtali við fréttastofu í kvöld.

„Íslendingar munu aldrei byggja nýjan flugvöll“

„Íslendingar munu aldrei byggja nýjan flugvöll, það er bara þannig,“ sagði Elín Árnadóttir, aðstoðarforstjóri Isavia á fundi Sjálfstæðisfélagsins á Akureyri í kvöld, um framtíð Reykjavíkurflugvallar og stöðu innanlandsflugsins.

Mest lesið


Fleiri fréttir

Sjá meira


×

Mest lesið