SA segja flumálastarfsmenn fara fram á 25,6 prósenta hækkun

Samtök atvinnulífsins segja að Félag flugmálastarfsmanna ríkisins hafi farið fram á 25,6 prósenta hækkun launa. Ekki einnar prósentar eins og forystumenn FFR hafi haldið fram við fjölmiðla.

Þetta kemur fram í tilkynningu frá Samtökum atvinnulífsins.

Þar segir að viðræðum Isavia og FFR hafi verið frestað, þar sem enn beri mikið milli aðila. Þriðja vinnustöðvunin verði því að veruleika á Keflavíkurflugvelli á morgun.

„Fram hafa komið rangfærslur þar sem því hefur verið haldið fram af forystumönnum FFR í fjölmiðlum að krafa þeirra sé 1% hækkun launa en hið sanna er að krafan er að meðaltali um 25,6% hækkun. Samninganefnd Samtaka atvinnulífsins og Isavia hefur lagt fram viðamikil tilboð sem fela í sér raunhæfar hækkanir á öllum launaflokkum.  Þeim tilboðum hefur öllum verið hafnað,“ segir í tilkynningu SA.

Þá segir einnig að samtökin vinni ásamt Isavia samkvæmt þeim áherslum sem aðilar á almennum vinnumarkaði höfðu í sínum samningum. Þær miði að því að tryggja kaupmátt í samfélaginu.

„Samtök atvinnulífsins hafa ennfremur sýnt fullan vilja til gera kjarasamning til lengri tíma en gert hefur verið áður í þessari lotu.“