Nýr leikur á sviði fjármálalæsis

Landsbankinn hefur þróað spurningaleikinn Fjármálahreysti með það að markmiði að efla fjármálalæsi ungmenna. Leikurinn er öllum opinn á vefslóðinni fjarmalahreysti.is og sérstaklega hannaður fyrir snjalltæki. Samkvæmt tilkynningu frá bankanum er um að ræða nýstárlega leið til að efla fræðslu um fjármál.

Efnt verður til sérstakrar keppni í Fjármálahreysti milli nemenda í efstu bekkjum grunnskóla á tímabilinu 8. apríl – 8. maí. Stigahæstu nemendurnir fá vegleg verðlaun sem afhent verða í beinni útsendingu í úrslitaþætti Skólahreysti á RÚV föstudaginn 16. maí. Einnig fær sá skóli þar sem hlutfallslega flestir nemendur spreyta sig á leiknum viðurkenningu.

Í Fjármálahreysti leysa þátttakendur 64 verkefni á fjórum ólíkum efnissviðum, snerta fjóra þekkingarflokka og eru sett fram á jafnmörgum þyngdarstigum. Efnissviðin fjögur eru: Ég, Heimilið, Nám og atvinna og Samfélagið og tekur þessi flokkun mið af markmiðum OECD um fjármálafræðslu.

Leikurinn var hannaður og þróaður af starfsfólki Landsbankans í samvinnu við Ómar Örn Magnússon aðstoðarskólastjóra í Hagaskóla sem hefur mikla reynslu af því að semja kennsluefni um fjármál fyrir unglinga. Fjármálahreysti tekur við hlutverki Raunveruleiksins sem Landsbankinn hefur staðið að síðustu tíu ár. Sá leikur hlaut á sínum tíma verðlaun Norrænu ráðherranefndarinnar sem besta námsefnið í fjármála- og neytendafræðslu. Ómar Örn var einnig aðalhöfundur Raunveruleiksins.

„Landsbankinn hefur um árabil lagt mikla áherslu á fjármálafræðslu fyrir efstu bekki grunnskóla og stendur mjög framarlega í fjármálafræðslu á Íslandi. Hönnun Fjármálahreystis sýnir þann metnað sem í bankanum býr þegar kemur að þessum málalflokki, enda er leikurinn allt í senn fróðlegur, spennandi og skemmtilegur. Rannsóknir sýna að þeir sem notið hafa kennslu í fjármálum eru líklegri til að spara og skipuleggja fjármál sín betur en aðrir og Landsbankinn telur það skyldu sína að auka fræðslu á þessu sviði,“ er haft eftir Steinþóri Pálssyni bankastjóra Landsbankans í tilkynningu.