Viðskipti með bréf Sjóvá fara ágætlega af stað

Tryggingafélagið Sjóvá var í morgun skráð á Aðalmarkað Kauphallarinnar þegar Páll Harðarson, forstjóri Nasdaq OMX Iceland og Hermann Björnsson, forstjóri Sjóvár, undirrituðu samning þess efnis.

Nú þegar rúm klukkustund er liðin frá skráningu félagsins nema viðskipti með bréf þess um 120 milljónum króna.

Hermann Björnsson sagði í morgun skráningu Sjóvár á markað marka tvenns konar tímamót.

„Annars vegar lok á þessu skráningarferli sem hefur staðið yfir í sjö mánuði. Það ferli hefur gengið býsna vel að okkar mati. Þessu tímabili er nú að ljúka og nú tekur alvaran við og við munum undirgangast öguð vinnubrögð, getum við sagt, og leggja okkar verk í dóm fjárfesta. Það er í sjálfu sér tilhlökkunarefni. Við erum vel í stakk búin til þess og kvíðum engu í því,“ sagði Hermann.

„Það er alvöru mál að koma inn í Kauphöllina en við megum ekki gleyma að í þessu umhverfi felast gífurleg verðmæti ef rétt er á málum haldið,“ sagði Páll Harðarson eftir að hann hafði boðið Sjóvá velkomið í Kauphöllina.

„Það er ekki nokkur vafi í okkar huga hér í Kauphöllinni að Sjóvá er mjög mikilvæg viðbót við hlutabréfamarkaðinn. Þetta er glæsilegt félag og því gengur vel og er leiðandi á sínu sviði. Við sjáum á hlutafjárútboðinu að það er mikill áhugi á því meðal fjárfesta. Félagið er fyrsta félagið sem kemur inn á þessu ári og reyndar áttunda félagið frá því sem við viljum kalla upphafi endurreisnar. Að okkar mati hefur þessi uppbyggingarfasi gengið afskaplega vel.Almenningur hefur verið að njóta góðs af og traustið á markaðinum er að eflast. Þegar allt kemur til alls þá byggir uppbygging á trausti,“ sagði Páll.

Hlutafjárútboði Sjóvár lauk 31. mars síðastliðinn. Heildareftirspurn í útboðinu var 35,7 milljarðar króna og því rúmlega sjöfalt meiri en 4,7 milljarða söluandvirði þeirra hluta sem boðnir voru út.