Höftin eru að ganga frá íslensku efnahagslífi

Stóru íslensku iðnfyrirtækin Össur, Marel og CCP eru á barmi þess að flytja höfuðstöðvar sínar frá Íslandi.

Þetta er fullyrt í vefmiðlinum Kjarnanum. Þar segir að mikil barátta hafi átt sér stað bak við tjöldin undanfarin misseri í viðskiptalífinu sem og stjórnmálunum. Átökin eru vegna þeirrar stöðu sem fjármagnshöftin, þrotabú föllnu bankanna og ákvörðun stjórnvalda um að draga formlega til baka umsókn um aðild að Evrópusambandinu hefur haft í för með sér. Þorsteinn Víglundsson er framkvæmdastjóri Samtaka atvinnulífsins og honum kemur þetta hreint ekki á óvart.

„Þetta er náttúrlega mjög alvarleg staða í þessu máli. Kemur hins vegar ekkert á óvart í ljósi þess að talsmenn þessara fyrirtækja hafa varað mjög lengi við afdrifaríkum hafta á rekstur fyrirtækja þeirra. Það er auðvitað alveg ljóst að hvað þetta varðar höfum við verið á skilorði og til lengri tíma litið er algjörlega óásættanlegt rekstrarumhverfi fyrir alþjóðleg fyrirtæki hafandi gjaldeyrishöft hér á landi. Það snýr ekkert bara að stórum og sterkum iðnfyrirtækjum eins og Marel og Össuri heldur ekki síður ungum sprotafyrirtækjum sem okkur hefur þótt neyðst fullsnemma til að taka upp starfsemi og flutt hana út fyrir landsteina til að geta vaxið og dafnað.“

Þorsteinn heldur að stjórnvöld hljóti að gera sér grein fyrir alvarleika málsins. Og vonast til að þau nái árangri í afnámi hafta á þessu ári.

„Við eigum engan annan valkost í stöðunni. Þetta ástand hefur varað alltof lengi. Gjaldeyrishöftin áttu að vera til tveggja ára en þau hafa nú fylgt okkur nú í fimm ár. Og við þetta verður ekki unað mikið lengur.“

Þorsteinn segir enga leið að meta hvaða afleiðingar það hefði fyrir íslensk efnahagslíf ef áðurnefnd fyrirtæki tæku sig upp, þær yrðu alvarlegar.