Stefna Rann­ís vegna neitunar um endur­greiðslu

Þetta kemur fram í fréttatilkynningu frá Bioeffect en fréttastofa fjallaði í vikunni um það að það færðist í vöxt að nýsköpunarfyrirtækjum sé synjað um endurgreiðslur vegna rannsókna og þróunar. 

Sviðstjóri hjá Samtökum iðnaðarins kallaði þá eftir því að stjórnvöld drægju úr óvissu og samtökin hafa bent á að tækni- og hugverkafyrirtæki hefðy á síðasta ári skilað þjóðarbúinu meiri útflutningstekjum en sjávarútvegurinn.

Telja bindandi ákvörðun hafa legið fyrir

Í tilkynningu segir að Bioeffect byggi málshöfðunina annars vegar á því að í málinu hafi legið fyrir bindandi stjórnvaldsákvörðun af hálfu Rannís um að samþykkja umsóknina áður en Rannís hafi breytt afstöðu sinni og hafnað umsókn félagsins. Hins vegar telji Bioeffect að jafnvel þótt ekki verði á það fallist að bindandi ákvörðun hafi legið fyrir, þá hafi endanleg synjun Rannís verið efnislega í andstöðu við lög og að við meðferð málsins hafi Rannís brotið á rétti félagsins samkvæmt stjórnsýslulögum með margvíslegum hætti.

„Bioeffect virðist ekki eitt um að lenda í þessari stöðu en líkt og komið hefur fram í fjölmiðlum, hafa ýmsir aðilar lýst gjörbreyttri og neikvæðari afstöðu og nálgun Rannís, þótt ekki liggi fyrir neinar laga- eða reglugerðarbreytingar sem skýrt geta breytta framkvæmd.“

Synjunin röng að formi og efni til

Þá segir Bioeffect sé leiðandi á alþjóðavísu í þróun húðvara sem byggi á vaxtarþáttum framleiddum með aðferðum plöntulíftækni sem lykilinnihaldsefni og leggi mikla áherslu á rannsóknir og vöruþróun. 

„Félagið telur synjun Rannís ranga bæði að formi og efni til og hefur því ákveðið að leita réttar síns fyrir dómstólum.“

Félagið muni ekki tjá sig frekar um efni málsins á meðan það er til meðferðar hjá dómstólum.