"Ég óttast um líf foreldra minna og vina"

Sergei Lavrov, utanríkisráðherra Rússlands, fundaði í dag í París með leiðtogum Bandaríkjanna og lykilríkja Evrópusambandsins í von um lausn á deilunni í Úkraínu.

Vonast er til þess að viðræðurnar í París leiði til sátta en utanríkisráðherra Breta, William Hague, segir Rússa þegar hafa hunsað fundi með Úkraínumönnum og er því ekki bjartsýnn.

Bandaríkjamenn, sem ætla að auka hernaðarsamstarf við Pólland og Eystrasaltsríkin, vilja alþjóðlega eftirlitsmenn til Úkraínu en búist er við að Rússar kalli eftir auknum hlut rússneskumælandi svæða í stjórn landsins. Rússar segjast ekki stjórna herjum sem tekið hafa völdin á Krímskaga, en þeir hafa nú lagt undir sig tvær flugskeytastöðvar úkraínska hersins.

Á annan tug manna særðist þegar mótmælendur hliðhollir Rússum lögðu undir sig stjórnarbyggingu í Donetsk síðdegis en það er eitt helsta vígi Viktors Janúkovítsj, fyrrum forseta. Í Kiev lagði fólk blóm á sjálfstæðistorgið í minningu fallinna mótmælenda en íbúar á Krím binda vonir við fyrirhugaða atkvæðagreiðslu um sjálfstæði svæðisins, þrítugasta þessa mánaðar.

Timur Zolotuskiy, prestur rússnesku rétttrúnaðarkirkjunnar á Íslandi, segir stöðuna í Úkraínu skelfilega. Hann segir óvíst hvort og þá hvenær fjárstuðningur, sem lofað hafi verið, skili sér og hlutverk kirkjunnar sé að standa vörð um fólkið. Hann óskaði eftir því við íslenska trúarleiðtoga í dag, að þeir stæðu saman að söfnun fyrir fólk í neyð í Úkraínu.

„Það verður enginn sigurvegari í slíku stríði“

Natalia Rumba fæddist í Sevastopol á Krímskaga og bjó þar þangað til hún flutti til Íslands fyrir sex árum. Fjölskylda hennar og vinir búa þar enn.

„Ég hringi daglega í föður minn og móður og tala við þau í nokkra klukkutíma á dag. Ég tala líka við vini mína í Sevastopol í gegnum netið og þannig eru allar upplýsingar sem ég fæ frá fyrstu hendi,“ segir hún.

Natalia segir fjölmiðla draga taum Vestur Úkraínumanna sem dreifi hatursáróðri um Rússa, sem séu ekki að hernema Krím heldur verja íbúana. Vísar hún í netupptökur frá Krím frá tuttugastaogþriðja febrúar síðastliðnum, sem sjá má í meðfylgjandi myndskeiði, þegar tuttuguogfimm þúsund manns hafi komið þar saman og kallað eftir aðstoð Rússa.

Hún segir að eftir upplausn Sovetríkjanna hafi verið óljóst hverjum Krím tilheyrði og allt í einu hafi það heyrt til Úkraínu án þess að íbúarnir væru nokkurn tímann spurðir álits. 96% íbúa á Krím hafa rússnesku sem móðurmál og yfir 70% þeirra eru Rússar.

„Og ég vil ítreka að fyrstu lög sem þessi sjálfskipaða ríkisstjórn Úkraínu samþykkti voru lög um að banna rússnesku og viðlögð refsing er fangelsisvist.“

Hún segir að líkja megi þessu við að Íslendingar vöknuðu upp einn daginn og allt í einu væri litlum hluta þjóðarinnar bannað að tala móðurmálið.

Hefurðu áhyggjur af stöðunni og af fjölskyldu þinni?

„Ég hef miklar áhyggjur. Ég óttast um líf foreldra minna, vina minna og allra rússneskumælandi íbúa Krímskaga.“

Aðspurð kveðst Natalia þó ekki búast við stríði.

„Ég held að fólk sé nógu skynsamt til að skilja að það gæti orðið síðasta stríðið í sögu mannkynsins. Það verður enginn sigurvegari í slíku stríði.“