Segir WOW Air geta sjálfum sér um kennt

Frank Holton, samræmingarstjóri Keflavíkurflugvallar, Kastrupflugvallar og Vágar flugvallar í Færeyjum, segir aðstæður Wow Air vera  fyrirsjáanlegar. Hann segir WOW Air aldrei hafa leitað til samræmingarstjóra eins og þeim var í lófa lagið að gera, en hann hefur alfarið séð um úthlutun afgreiðslutíma á Keflavíkurflugvelli allt frá árinu 2005.

Holton furðar sig á því að íslensk samkeppnisyfirvöld séu komin í málið, enda séu íslendingar búnir að framselja vald til úthlutunar afgreiðslutíma á Keflavíkurflugvelli til samræmingarstjóra í samræmi við evrópureglur, sem búið sé að innleiða með reglugerð um úthlutun afgreiðslutíma flugvalla nr. 1050/2008.

„Af einhverjum ástæðum kaus WOW Air að einskorða umsókn sína um afgreiðslutíma við nákvæmlega þá tíma sem Icelandair var með fyrir. Ef þeim hefðu verið veittir þeir tímar hefði það valdið Icelandair vandræðum með að halda áætlunum á öðrum flugvöllum, sem er varla forsvaranlegt," segir Holton í samtali við fréttavefinn newstodate.aero.

Samkeppnisyfirvöld eiga ekki að blanda sér í málið

„Þeim voru í staðin boðnir allir þeir tímar sem þeir þurftu um klukkutíma utan háannatíma Icelandair, sem þeir höfnuðu. Í staðin ákváðu þeir að leita á náðir samkeppnisyfirvalda sem úrskurðuðu að Isavia væri skylt að afhenda WOW fjögur pláss," segir Holton.

Vegna áfrýjunar úrskurðar samkeppniseftirlitsins af hálfu Isavia og Icelandair hafi WOW Air tilkynnt að þeir myndu ekki hefja flug til Norður-Ameríku, enda frestaði áfrýjunin réttaráhrifum upprunalega úrskurðarins.

„Ef WOW hefði bara sýnt smá sveigjanleika hefði málið aldrei orðið að ágreiningi. Það er líka vert að benda á það að það hefði aldrei átt að blanda íslenskum samkeppnisyfirvölum í málið, enda hafa þau ekki lögsögu við úthlutun afgreiðslutíma á flugvellinum þar sem það vald hefur verið framselt til Evrópu," segir Holton.

Í samtali við fréttastofu 365 segir Holton: „Það hefði kannski verið skynsamlegt ef fólkið í Samkeppniseftirlitinu hefði haft samband við okkur sem sjáum um að úthluta þessum tímum áður en þau komust að þessari niðurstöðu. Það er alveg ómögulegt að reyna að þvinga staðbundna úrskurði á alþjóðlegt kerfi. Ef það væri gert væri ekki hægt að hafa þetta samræmda kerfi," segir Holton.

Segir Isavia ekki hafa neitt um úthlutun að segja

Holton segir að samkvæmt evrópulöggjöf fari samræmingarstjóri einn með úthlutun og Isavia sjái bara um að fara eftir því sem frá honum kemur. Í íslensku reglugerðinni segir í 4. gr.: „Samræmingarstjóri skal einn bera ábyrgð á úthlutun afgreiðslutíma."

Holton segir að samkvæmt reglunum öðlist flugfélög afgreiðslutíma byggða á hefðarrétti. Þá segir hann að jafnræði sé á milli aðila og að sömu reglur gildi hvort sem er á Heathrow, Kastrup, Schönefeld eða Keflavíkurflugvelli, enda væri annars ómögulegt að samræma brottfarar- og komutíma og að ringulreið myndi ríkja ef málum væri ekki háttað á þennan veg.

„Þetta er bara svona því við erum bara með ákveðið mörg hlið í Keflavík og við þurfum að fara eftir reglunum," segir Frank Holton að lokum.