Stúdentar líða fyrir lögbrot Illuga

Síðastliðið haust lagði Illugi Gunnarsson 1,5% niðurskurðarkröfu á Lánasjóð íslenskra námsmanna. Því markmiði ætlaði hann að ná með því að hækka námsframvindukröfu sjóðsins í 22 einingar og þannig þrengja lántakendahópinn. Sú stefnubreyting varð að engu þegar námsmannahreyfingarnar kærðu þá framkvæmd og unnu fullnaðarsigur. Þrátt fyrir niðurstöðu dómsins miðaði fjárframlag ríkisins til LÍN ekki við að lántakendahópurinn héldist óbreyttur heldur gerði það ráð fyrir fyrirhugaðri ólöglegri aðgerð Illuga.

Illugi hélt þó niðurskurðarkröfu sinni enn til streitu og mætti henni með því að láta sjóðinn ganga á eigið fé. Þessar ákvarðanir hans hafa valdið því að enn stærra gat þarf nú að brúa í rekstri sjóðsins.

Námsmenn eiga því ekki einungis í vændum að lántakendahópurinn verði þrengdur heldur enn frekari kjaraskerðingu í komandi úthlutunarreglum. Skerðingu sem nemur þeirri upphæð sem féll á sjóðinn vegna þess að Illugi gat ekki framkvæmt aðgerð sem var frá upphafi ólögmæt.

Ráðherra er því beinlínis að refsa námsmönnum fyrir að hafa andmælt lögbroti og verður það að teljast uggvænlegt fordæmi fyrir hvern þann sem hyggst leita réttar síns gegn stjórnvöldum í framtíðinni.

Á sama tíma og ráðherra lagði þessar birgðar á lánasjóðinn hreykti hann sér af því að grunnframfærslan skyldi hækkuð um 3%, hækkun sem nemur ekki verðbólgu síðasta árs. Hann lagði þó ekki aukið fé til sjóðsins vegna þessarar lögbundnu verðbólguhækkunar heldur jók enn á vanda hans með fyrrnefndum ákvörðunum sínum.

Ofan á þetta dró Illugi til baka fyrirhugaða hækkun frítekjumarksins úr 750.000 kr. í 900.000 kr. sem var hugsuð til að mæta verðlagsþróun undanfarinna fjögurra ára. Frítekjumarkið hefur því ekki verið hækkað síðan árið 2009 með tilheyrandi kjararýrnun fyrir stúdenta í takt við hækkandi verðlag.

Ráðherrann sem rak prófkjörs- og alþingiskosningabaráttu sína á gífuryrðum um fjárfestingu í menntamálum og mikilvægi þess að menntamál yrðu í forgrunni stjórnarstefnunnar hefur því sem sagt séð til þess að nú þarf að brúa 350 milljóna króna gat í rekstri sjóðsins.

Ef hann fellur ekki frá þessum pólitísku ákvörðunum sínum munu þær endurspeglast í úthlutunarreglum næsta árs. Lántakendahópurinn verður þrengdur og lánakjör skert. Það sem áður var félagslegur jöfnunarsjóður mun vega að jafnrétti til náms. Ráðherra sækir peninga í vasa stéttarinnar sem hefur mátt þola hvað mestar kjaraskerðingar á undanförnum árum; í vasa stúdenta. Lífskjör námsmanna munu líða fyrir lögbrot Illuga.