Þrjú börn á þremur árum - sjáðu prinsessuna sem fæddist um helgina

Vaxtarræktarjöfurinn Magnús Bess Júlíusson og unnusta hans, fitnessdrottningin Katrín Eva Auðunsdóttir, eigðnuðust 17 marka stúlku á sunnudagsmorgun. Hún er þriðja barnið þeirra á þremur árum. Við heyrðum stuttlega í Katrínu sem er að vonum í skýjunum.

Fjölskyldan saman jólin 2013 þá Katrín barnshafandi af stúlkunni sem fæddist á sunnudagsmorgun. Hér heldur hún á Ísabellu Bess sem fæddist 30. mars 2011. Þá er Ísak Auðunn Bess sem kom í heiminn 6. júlí árið 2012 í fanginu á pabba sínum.

,, Algjör orkubolti með mikið svart hár," skrifaði Katrín við þessa mynd af prinsessunni.



Allt hefur gengið eins og í sögu

„Ég hef verið ótrúlega heppin með fæðingarnar og allar gengið eins og í sögu. Þessi þriðja var samt auðveldust og við vorum farin heim bara nokkrum tímum seinna. Ég fór uppá spítala rúmlega klukkan þrjú að nóttu til og hún fæddist svo klukkan 8:14 í gærmorgun,“ segir Katrín sem gekk með stúlkuna tæplega 42 vikur. 



Ólétt síðan þjálfunin hófst

Saman reka Magnús og Katrín vefinn Betriárangur.is. Hvernig gengur að reka heimili samhliða þjálfuninni? 

„Ég er í besta starfi í heimi samhliða þessum meðgöngum og hef í raun verið ólétt eða nýbúin að fæða alveg síðan við byrjuðum með þjálfunina,“ útskýrir Katrín og heldur áfram: „Þannig að við látum þetta ganga upp. Þjálfunin hefur undið mjög svo uppá sig og þetta er orðið virkilega stórt batterí í dag en ég vil þakka hinum kvenhelmingnum mínum  Alexöndru Sif fyrir sinn metnað í garð þjálfunarinnar. Án hennar værum við ekki á þessum stað. Því þegar ég er með veikt barn heima eða að fæða og svo framvegis þá stendur hún vaktina og er alltaf tilbúin til að vera langt fram á kvöld og fórna helgarfríinu sínu í að klára allt sem fyrir er.“



Lífið er ljúft

„Mér finnst við því ríkasta fólk í heimi. Við höfum kynnst svo frábærum stelpum og konum í gegnum starfið, allt þetta barnalán, rík af vinum og eigum bæði frábærar fjölskyldur. Lífið er svo ljúft,“ segir nýbökuð mamman áður en kvatt er.

Fyrir á Magnús þær Rögnu Dögg fædda 1991 og Viktoríu Rós fædda 1997.