Bono í áramótagleði í Þingholtunum

„Ég hitti hann aðeins í partýi í Þingholtunum í gær,“ sagði Egill Örn Rafnsson tónlistarmaður þegar blaðamaður hafði samband við hann vegna myndar sem Egill birti á Facebook-síðu sinni af sér og Bono, söngvara U2.

Bono var hinn almennilegasti að sögn Egils. „Ég hef ekki lagt það í vana minn að láta taka myndir af mér með frægu fólki, en mér þótti merkilegt að hitta hann,“ segir hann.

Egill talaði ekki mikið við Bono sem var í fylgd eiginkonu sinnar og tónlistarmannsins Damien Rice.

Eins og fram kom á Vísi í gær lenti Bono á Reykjavíkurflugvelli á fjórða tímanum í gær eftir flug frá Dublin. Kári Sturluson tónleikahaldari sagði í gær í samtali við Vísi að Bono myndi eflaust halda á brott af landinu í dag. Þó væri það ekki víst.