LeBron og Kevin Durant bestir í desember

LeBron James hjá Miami Heat og Kevin Durant hjá Oklahoma City Thunder voru valdir bestu leikmenn desember-mánaðar í NBA-deildinni í körfubolta. James var sá besti í Austurdeildinni en KD sá besti í Vesturdeildinni.

LeBron James fór fyrir liði Miami Heat sem vann 11 af 15 leikjum sínum í desember. Hann varð annar í stigaskori  í Austurdeildinni í mánuðinum (24,6 stig í leik), fimmti í skotnýtingu (58,1 prósent), sjötti í bæði stoðsendingum (6,9 í leik) og stolnum boltum (1,64 í leik) og tólfti í fráköstum (8,1 fráköst í leik).

Kevin Durant fór fyrir liði Oklahoma City Thunder sem vann 14 af 17 leikjum sínum í desember. KD var annar stigahæsti leikmaður NBA-deildarinnar í desember (29,4 stig í leik) auk þess að taka 9,0 fráköst og gefa 4,5 stoðsendingar að meðaltali í leik. Hann hitti úr 48 prósent skota sinna fyrir utan þriggja stiga línuna og skoraði fimmtán sinnum yfir 20 stig og tíu sinnum yfir 30 stig í þessum sautján leikjum.

Kevin Durant var einnig valinn besti leikmaður Vesturdeildarinnar í nóvember en þá var Paul George hjá Indiana Pacers kosinn besti leikmaður Austurdeildarinnar.

Aðrir sem komu til greina sem leikmenn mánaðarins voru þeir Kyrie Irving hjá Cleveland Cavaliers, Stephen Curry hjá Golden State Warriors, Paul George og Lance Stephenson hjá Indiana Pacers, Blake Griffin og Chris Paul hjá Los Angeles Clippers, Kevin Love hjá Minnesota Timberwolves, Arron Afflalo hjá Orlando Magic, LaMarcus Aldridge hjá Portland Trailblazers og Kyle Lowry hjá Toronto Raptors.