Krónan óvenju sterk í ársbyrjun

Fanney Birna Jónsdóttir skrifar 7. janúar 2014 13:02

Íslandsbanki segir gengisþróun krónu hafa verið ólík í vetur því sem var árin á undan. Mynd/GVA

Eftir myndarlega styrkingu í desembermánuði er gengi krónu í ársbyrjun nú umtalsvert hærra en raunin var á sama tíma í fyrra. Þetta kemur fram í morgunkorni Íslandsbanka.

Verðbólguþrýstingur er að sama skapi minni um þessar mundir. Þróunin kemur Seðlabankanum vel, enda eykur hún trú á getu bankans til að halda gengissveiflum í skefjum, auk þess sem hann hefur náð að afla sér töluverðs gjaldeyris síðustu mánuði. Auk þess hefur þróunin dregið úr verðbólguvæntingum.

Þegar morgunkornið var ritað kostaði evran 158,5 krónur og Bandaríkjadollar 116 krónur á millibankamarkaði.

Í ársbyrjun 2013 kostaði evran hins vegar tæplega 169 krónur og dollarinn nærri 128 krónur Krónan er því um það bil 7% sterkari gagnvart evru og 10% sterkari gagnvart dollar en raunin var fyrir ári síðan.

Gagnvart viðskiptaveginni körfu helstu gjaldmiðla er krónan nú um það bil 10% sterkari en raunin var fyrir ári síðan.

Íslandsbanki segir gengisþróun krónu hafa verið ólík í vetur því sem var árin á undan.

Frá nóvemberbyrjun 2013 hefur krónan styrkst um ríflega 4% gagnvart körfu helstu gjaldmiðla og hefur hún ekki verið sterkari á þennan mælikvarða síðan í maí síðastliðnum.

Frá nóvemberbyrjun 2012 fram til áramóta veiktist krónan hins vegar um nærri 3%, og árið þar á undan nam veikingin á sama tímabili nærri 2%. Bankinn taldi að til skamms tíma myndi krónan sigla lygnari sjó í vetur en oft áður, en styrkingin undanfarið hafi komið á óvart.

Í morgunkorninu segir að ýmsar ástæður séu fyrir þessari ólíku þróun.

Afborganir erlendra lána fyrirtækja og opinberra aðila séu talsvert smærri í sniðum þennan veturinn en raunin var ári fyrr.

Þá hafi gjaldeyrisstaða Landsbankans breyst mikið, og endurspeglast sterk lausafjárstaða bankans í gjaldeyri, meðal annars í 50 milljarða króna fyrirframgreiðslu hans inn á skuldabréf gagnvart þrotabúi gamla Landsbankans.

Síðast en ekki síst hafi gjaldeyrisinnflæði vegna ferðamanna og vöruviðskipta aukist milli ára, og sér í lagi hefur ferðamannastraumur utan háannatíma vaxið umtalsvert.

Ekki lítur út fyrir að veruleg breyting verði á þessum aðstæðum næsta kastið, og því eru ágætar líkur á að gengi krónu muni áfram verða nokkru hærra en var í fyrra, þótt ómögulegt sé að segja til um skammtímasveiflur í genginu.

Mest lesið

Fleiri fréttir