Orri var uppgötvaður í Bónus

„Helgi Ómarsson ljósmyndari sá mig í Bónus fyrir þremur árum. Hann hafði svo samband og bað mig um að koma í myndatöku. Ég var hálfragur við það fyrst en lét svo til leiðast,“ segir hinn 19 ára Orri Helgason sem er nemi í Verslunarskólanum.

Eftir myndatökuna fóru hjólin að snúast, Orri fór á skrá hjá Eskimo Models og myndirnar sem Helgi Ómarsson tók rötuðu inn á tískusíðuna Thefashionisto.com. Skömmu síðar bauðst Orra tækifæri til að fara til Mílanó á vegum Eskimo Models og fyrirsætuskrifstofunnar 2morrow Model í prufur hjá Calvin Klein. Þá fékk hann ekki tækifæri til að spreyta sig en í síðustu viku var Orri sérbókaður að nýju til Mílanó og fór í prufur fyrir Versace. Hann endaði á tískupallinum ásamt öðrum þaulvönum fyrirsætum. Hann segist hafa verið óvenju lítið stressaður þegar sýningin fór í gang og hafi í raun ekki áttað sig á öllu umfanginu fyrr en heim kom.

„Mér fannst þetta allt voðalega skrítið. Ég var settur í hár- og handsnyrtingu og förðun og gekk á smá hælum á runway-inu,“ segir hann og hlær. „Þarna var fólk í bransanum sem vildi mynda sig með Orra frá Íslandi, sem ég skil ekki. Svo sat tónlistarmaðurinn Drake á fremsta bekk og ég sá hann ekki einu sinni.“

Andrea Brabin, eigandi Eskimo Models, segir árangur Orra þann besta sem karlfyrirsæta frá Íslandi hefur náð á svo skömmum tíma. Orri hyggst þó ekki hella sér alfarið í fyrirsætubransann og segist vilja klára skólann með glæsibrag og halda áfram að iðka crossfit sem keppnisíþrótt.

Hægt er skoða fleiri myndir af Orra á hér.