Lengi býr að fyrstu gerð

Senn líkur fyrsta áfanga í skólagöngu dóttur minnar og nýr og spennandi áfangi tekur við.  Það er óhætt að segja að það er með þakklæti og hlýhug sem við kveðjum það frábæra og metnaðarfulla starf sem fram fer á leikskólanum Norðurberg í Hafnarfirði.

Dóttir mín hefur undanfarin rúm fjögur ár unað sér vel við lærdóm og leik og óhætt að segja  að starfið fór fram úr mínum væntingum. Ég hef séð hana vaxa og dafna og læra svo margt sem ég hefði ekki með nokkru móti geta komist yfir eða verið í aðstöðu til að kenna henni.

Vegna þess góða starfs sem þar er unnið er hún vel undirbúin fyrir næsta skólastig sem tekur við nú í haust.

Það er mér því með öllu  óskiljanlegt það metnaðarleysi sem ríkir þegar kemur að launakjörum leikskólakennara. 

Börnin eru það dýrmætasta sem við eigum það er öllum ljóst, þegar kemur að því að borga laun fyrir það frábæra starf sem unnið er á leikskólum landsins er eins og það ríki algjör vanþekking við mat á því frábæra og metnaðarfulla starfi sem þar er unnið.

Nú er komið nóg og hvet ég samninganefnd sveitafélaga til að setja börnin og framtíð þeirra í forgang  og meta það góða og mikilvæga starf sem unnið er á leikskólum landsins.

Við þökkum starfsfólki leikskólans Norðurberg í Hafnarfirði  kærlega fyrir okkur.

Með bestu kveðju,

Kolbrún Árnadóttir og Sigrún Kolbrúnardóttir