Conchita Wurst efst á vinsældarlista í Rússlandi

Lag Austurríkis sem sigraði í söngvakeppni Evrópskra sjónvarpsstöðva síðastliðinn laugardag er efst á vinsældarlista iTunes í Rússlandi.

Conchita Wurst söng lagið Rise like a Pheonix og vakti hún sérstaka athygli fyrir fallega rödd sína og þéttan skeggvöxt. 

Þrátt fyrir að hafa staðið sig með stakri prýði hefur hún verið töluvert gagnrýnd af stjórnvöldum í Rússlandi. Fjöldinn allur af stjórnmálamönnum hafa látið gagnrýna og harðorða skoðun sína í ljós í garð Conchitu síðastliðna daga.

„Fyrir fimmtíu árum síðan hertóku Sovétmenn Austurríki. Við gerðum mistök þegar við frelsuðum landið,“ sagði þingmaðurinn Vladimir Zjironovskij.

„Þetta eru endalok Evrópu. Hún er orðin villt. Það eru ekki lengur bara menn og konur. Heldur líka „þetta“.“ sagði þingmaðurinn jafnframt.

Mikið var púað á framlag Rússa í keppninni, lagið Shine í flutningi systranna síðastliðinn laugardag. Líklegt verður að teljast að óánægju áhorfenda hafi ekki verið beint að söngkonunum tveimur, heldur tengist þetta yfirvöldum í Rússlandi sem hafa ekki vakið mikla lukku á alþjóðagrundvelli undanfarin ár.