Þvertók fyrir að hafa haft áhrif á hlutabréfaverð

Björgólfur Thor Björgólfsson kom fyrir Héraðsdóm Reykjavíkur í dag og bar vitni í markaðsmisnotkunarmáli Landsbankans. Átti hann rúmlega 40% í bankanum á ákærutímabilinu 2007-2008 og hafði því hagsmuna að gæta varðandi verð hlutabréfa í bankanum.

Saksóknari spurði Björgólf út í hvort hann hefði gert eitthvað til að hafa áhrif á stöðuna þegar verð í hlutabréfum Landsbankans lækkaði í aðdraganda bankahrunsins. Sagðist hann ekki hafa gert það; hann hafi hins vegar rætt við stjórnendur bankans hvernig „bregðast ætti við óveðri“ en ekki hvernig hafa ætti „áhrif á veðrið.“

Var Björgólfur einnig spurður að því hvort hann hefði sérstaklega rætt við Sigurjón Þ. Árnason, bankastjóra, um framboð og eftirspurn eftir bréfum í Landsbankanum. Björgólfur sagðist ekki hafa gert það. Hann sagði framboð og eftirspurn ekki hafa varðað hagsmuni sína.

Saksóknari spurði svo að lokum hvort að nauðsynlegt hafi verið fyrir Landsbankann að kaupa eigin bréf rétt fyrir hrun.

„Ég hef ekki skoðun á því,“ svaraði Björgólfur.

Vitnaleiðslur í málinu halda áfram eftir hádegi í dag.