Datt aldrei í hug að bankinn gæti farið í þrot

„Ég hafði bara mikla trú á bankanum. Það var aldrei í okkar hugsun að eitthvað svona væri að koma fyrir. Það seinasta sem mér datt í hug var að hann gæti farið í þrot,“ sagði Björgólfur Guðmundsson, fyrrverandi formaður bankaráðs Landsbankans og einn aðaleigandi bankans í Héraðsdómi Reykjavíkur í morgun.

Björgólfur bar vitni við aðalmeðferð í máli sérstaks saksóknara á hendur stjórnendum og starfsmönnum Landsbankans vegna meintrar markaðsmisnotkunar en málið er eitt það stærsta sem sérstakur saksóknari hefur haft til rannsóknar í kjölfar efnahagshrunsins.

Innri endurskoðandi augu og eyru fyrirtæksins

Björgólfur sat í bankaráði frá árinu 2003-2008 og í vitnaleiðslum fór hann yfir hlutverk bankaráðs. Sagði hann það fyrst og fremst hafa verið til þess að ráða bankastjóra til að reka bankann ásamt því að ráða inn innri endurskoðanda. Fundir hafi verið haldnir að minnsta kosti einu sinni í mánuði þar sem gefin hafi verið munnleg eða skrifleg skýrsla um starfsemi fyrirtækisins.

„Við fengum einn starfsmann í innri endurskoðun sem hafði aðgang að öllu og hann var okkar augu og eyru í fyrirtækinu,“ sagði Björgólfur.

Vísað var í tölvupóst sem sendur var í ágúst 2008 sem sneri að hugsanlegum samruna Landsbankans og Straums en þar kom fram að ef hlutabréf í bankanum myndu lækka frekar gæti það haft áhrif á lausafjárstöðu Samson. Björgólfur sagði  að um hafi verið að ræða áhættustýringu um hvað gæti gerst við ólíkar aðstæður. „Ég held að lausafjárstaða Samson hafi verið mjög góð á þessum tíma,“ sagði Björgólfur.  

Aðalmeðferð stendur nú yfir í Héraðsdómi Reykjavíkur.