Segja samræmingarstjóra ekki horfa til samkeppnissjónarmiða

Samkeppniseftirlitið vísar á bug ummælum Franks Holton, samræmingarstjóra Keflavíkurflugvallar, Kastrupflugvallar og Vágarflugvallar í Færeyjum sem hann lét falla í umfjöllun Vísis um úthlutun afgreiðslutíma á Keflavíkurflugvelli þann 8. febrúar. Þar segir Holton m.a. að WOW air hafi aldrei leitað til sín með kvörtunina áður en innlend samkeppnisyfirvöld voru fengin í málið og að Íslendingar séu búnir að framselja allt úthlutunarvald til alþjóðlegs samræmingarstjóra.

Í fréttatilkynningu frá Samkeppniseftirlitinu er þessum útskýringum hafnað og vísað til ákvörðunar nr. 25/2013 þar sem kemur fram að ítrekað hafi verið leitað sjónarmiða Franks Holton við meðferð málsins og að þeim hafi verið komið á framfæri. Samkeppniseftirlitið átti til að mynda fund með samræmingarstjóranum og að sú gagnaöflun hafi komið til viðbótar samskiptum við Isavia.

Í niðurstöðum Samkeppniseftirlitsins kemur fram að núverandi fyrirkomulag úthlutunar á afgreiðslutímum á vellinum valdi því að erfitt er fyrir nýja aðila að byggja upp leiðakerfi í áætlunarflugi milli Íslands, Evrópu og Norður-Ameríku og að Frank Holton hafi ekki horft til samkeppnissjónarmiða við síðustu úthlutun. Í ákvörðuninni er rakið að Icelandair er og hefur verið veittur forgangur að ákjósanlegustu afgreiðslutímunum á flugvellinum á morgnana og síðdegis og keppinautar Icelandair eigi ekki möguleika á að keppa við félagið í Ameríkuflugi á eðlilegum samkeppnisgrundvelli.

Í ákvörðuninni er rakið að í reglum um úthlutun afgreiðslutíma á Evrópska efnahagssvæðinu er að finna fyrirvara sem veitir innlendum samkeppnisyfirvöldum heimild til að krefjast breytinga á úthlutun afgreiðslutíma á grundvelli samkeppnislaga sem stangast á við ummæli Holtons. Með hliðsjón af þessum fyrirvara og ákvæðum samkeppnislaga mælti Samkeppniseftirlitið fyrir um úthlutun á afgreiðslutímum til WOW Air á álagstímum til að stuðla að því að samkeppni kæmist á í Ameríkuflugi.