Rödd foreldra er sterkasta verkfærið

Dagana 20. til 25. nóvember eru samtökin Blátt áfram, forvarnarverkefni að fara af stað með auglýsingar á næstu dögum í fjölmiðlum. Auglýsingarnar eru til þess að minna á mikilvægi forvarnarfræðslu gegn kynferðislegu ofbeldi á börnum. Við leggjum mikla áherslu á ábyrgð foreldra þegar kemur að forvörnum. Fræðsla sem þessi þarf að fara fram á milli foreldra og barna til að auka líkurnar á því að barn segi frá ef það lendir í einhverjum vandræðum. Slík fræðsla snýst meira um samskipti en nokkuð annað.

Hvernig líður barninu þínu? Í hvaða aðstæðum er barnið þitt dags daglega? Veit barnið þitt að þú ert upplýst og stendur með því ef það lendir í óþægilegum aðstæðum. Veistu hvert barnið þitt leitar ef því líður illa og hverjum það treystir?

Rödd foreldra er sterkasta verkfærið. Þegar þú velur að fylgjast með og hafa skoðun á þeim aðstæðum sem barni þínu er boðið upp á í hverju því starfi sem ætlað er börnum, ertu að gera rétt. Með því ertu að vernda barnið þitt.

Blátt áfram eru forvarnarsamtök sem miða að því að vekja samfélagið til meðvitundar um kynferðislegt ofbeldi á börnum. Það sem meðal annars knýr samtökin áfram er sú staðreynd að um 2000 börn hafa fengið aðstoð í Barnahúsi á síðustu 12 árum. Meirihluti barna sem verða fyrir kynferðisofbeldi eru 10 ára og yngri og gera sér ekki grein fyrir að það sem verið er að gera þeim, sé bannað. Flest börn sem verða fyrir kynferðislegu ofbeldi tilkynna það aldrei, en þau sem gera það og fá hjálp í kjölfarið eiga alla möguleika á að eiga gott líf. Einstaklingar sem beita börn kynferðislegu ofbeldi sækja í aðstæður sem veita þeim auðveldan aðgang að börnum. Hægt er að ræna barn æskunni á einu augnabliki, sakleysi sem kemur aldrei aftur.

Samkvæmt rannsókn Sigrúnar Sigurðardóttur, á afleiðingum og áhrifum ofbeldis á börn, þá fylgja þau barninu fram á fullorðinsárin t.d. með aukinni hættu á áfengis- og vímuefnanotkun, brotinni sjálfsmynd, átröskun, afbrotum, sjálfsvígum, glæpum og fleira.

Íslenskar rannsóknir sem hafa verið gerðar um tíðni kynferðisofbeldis á börnum sýna að 17 prósent barna hafa verið beitt kynferðislegu ofbeldi fyrir 18 ára aldur og að 27 prósent barna hafa orðið kynferðislegu áreiti fyrir 18 ára aldur.

Foreldrar eiga að vera upplýstir, spyrja spurninga og standa með barni sínu. Ef þú upplifir óöryggi og veist ekki hvernig þú á átt að taka þessi skref hvetjum við þig til að kynna þér forvarnarfræðslu sem er í boði fyrir foreldra á vefsíðu félagsins blattafram.is

Verum upplýst – verndum börnin okkar.