Kolding vann Kielce aftur

Aðeins viku eftir að danska liðið Kolding vann Póllandsmeistara Kielce í Danmörku í B-riðli Meistaradeildar Evrópu í handbolta vann Kolding viðureign liðanna í Póllandi í dag 26-25 í hörkuleik.

Jafnt var á öllum tölum leiksins en staðan í hálfleik var 15-15 en Kolding hafði betur í lokin í þessum háspennuleik.

Kolding er í öðru sæti riðilsins með 10 stig, jafn mörg og Kiel en lakari markamun. Kielce sem var ósigrað þegar liðið fór til Danmerkur er fallið niður í þriðja sæti riðilsins með 8 stig.

Bo Spellerberg var markahæstur Kolding með 7 mörk. Lasse Anderson skoraði 6 og Albert Rocas 4.

Þórir Ólafsson var ekki á meðal markaskorara Kielce en Uros Zorman skoraði mest, 6 mörk. Michal Jurecki skoraði 5 mörk og Ivan Cupic 3.