Apple og Samsung fyrir rétt enn eina ferðina

Apple og Samsung munu fara aftur fyrir rétt í einu stærsta einkaleyfisdómsmáli okkar tíma. Í ágúst 2012 var Samsung sakfellt fyrir að nýta sex einkaleyfi Apple og var dæmt til að greiða einhverjar stærstu skaðabætur sem skráðar hafa verið, eða 626 milljónir punda sem reiknast sem rúmlega 122 og hálfur milljarður íslenskra króna. Frá þessu er sagt á vef BBC.

Málatilbúnaður Apple var að Samsung hefði brotið gegn einkaleyfi fyrirtækisins með því að stela hönnun upprunalega iPhone og iPad, sem og að þegar þú flettir skjali of langt skoppar það til baka. Einnig að hægt sé að stækka myndir með því að tvísmella. Samsung sagðist þó hafa verið að vinna að þróuninni löngu áður en iPhone var opinberaður. Dómari úrskurðaði þó í mars síðastliðnum að upphæð skaðabótanna skyldi endurmetin og gæti hún því bæði hækkað og lækkað.

Þegar upprunalegu úrskurðurinn var kveðinn upp sagði Apple að hann gæfi skýr skilaboð um að ekki væri rétt að stela. Samsung sagði úrskurðinn vera slæman fyrir neytendur og myndi leiða til færri möguleika, minni nýsköpunar og hærra verðs.

Þetta er bara eitt þeirra dómsmála sem fyrirtækin eru að há um heiminn og eru fyrirtækin sem dæmi að kljást í réttarsölum fleiri en tíu landa í Evrópu. Þessi barátta gæti þó verið skaðleg fyrir viðskiptavini fyrirtækjanna.

Meðstofnandi Apple sagði sagði við BBC að hann sæi góða hluti í símum Samsung sem hann vildi að væru í iPhone símanum hans. „Ég vildi að Apple gæti séð þessa hluti og notað þá og ég veit ekki hvort Samsung myndi stoppa okkur,“ sagði Steve Wozniak við BBC, en hann stofnaði Apple með Steve Jobs. Hann sagðist einnig óska þess að fyrirtækin deildu tækni sín á milli. Þá yrðu tækin betri og við þróuðust hraðar.