Hlutabréf Vodafone á uppleið

Gengi hlutabréfa Vodafone á Íslandi hefur hækkað um 4,4 prósent eftir lækkun um tólf prósent í byrjun desember í kjölfar tölvuárásarinnar á heimasíðu félagsins. Frá árás hefur gengið einungis einu sinni lækkað milli daga.

„Gengið hefur verið að taka við sér og það skipti miklu máli þegar það komu fréttir frá félaginu um að innan við eitt prósent viðskiptavina hefði hætt viðskiptum við það. Þá skipti miklu máli að í þeim hópi voru engin fyrirtæki og menn róuðust mikið við það, segir Kristján Markús Bragason, umsjónarmaður hlutabréfagreiningar Íslandsbanka.

„Það sem menn horfa á núna er að sum þessara fyrirtækja geta ekkert hreyft sig fyrr en samningi þeirra lýkur eða þau geta sagt honum upp,“ segir Kristján.

Hlutabréf Vodafone hækkuðu um 8,7 prósent í nóvember þegar félagið tilkynnti um 415 milljóna króna hagnað á þriðja fjórðungi þessa árs. Mánuði áður hafði gengi bréfanna lækkað um átján prósent samanborið við desember 2012 þegar félagið var skráð í Kauphöll Íslands.

„Það hefur verið mikil hreyfing á hlutabréfaverði Vodafone enda hafa árshlutauppgjörin verið misgóð en viðbrögðin við þeim, og þá sérstaklega fyrsta ársfjórðungi 2013, hafa verið ansi sterk. Lækkunin í byrjun þessa mánaðar var þó einungis tengd fréttum af árásinni og viðbrögðum stjórnenda og þeirri óvissu sem kom upp,“ segir Kristján og vísar meðal annars í tilkynningu Vodafone um að óviðkomandi aðilar hefðu ekki komist í trúnaðarupplýsingar viðskiptavina.

Jón Hákon Magnússon, framkvæmdastjóri KOM almannatengsla, gagnrýnir fyrstu viðbrögð Vodafone.

„Viðbrögð þeirra voru sein og slæm. Félagið átti að taka á þessu af meiri hörku á laugardeginum þegar þetta gerðist og það er eins og þeir hafi ekki átt áfallaáætlun. Ég geri ráð fyrir að þeir eigi hana en ég veit ekki hvort þeir hafa farið eftir henni,“ segir Jón.

Um þrjú hundruð manns hættu viðskiptum við Vodafone á fyrstu fjórum dögunum eftir árásina.

„Það er alltaf talsverð hreyfing á þessum markaði en heilt yfir eru fleiri á leiðinni til okkar en frá okkur. Á sama tíma höfum við reynt að koma á framfæri þeim upplýsingum sem við teljum skipta máli fyrir markaðinn,“ segir Hrannar Pétursson, framkvæmdastjóri samskiptasviðs Vodafone.