Hlutabréf fyrir lengra komna

Þegar börnin mín voru mjög ung og spurðu mig „við hvað vinnurðu mamma?“ þá svaraði ég oft: „ég vinn við að búa til peninga“ og brosti. Ég sagði þetta meira í gríni en alvöru en það dugði þangað til þau urðu aðeins eldri.

Þá gat ég útskýrt betur fyrir þeim að ég fjárfesti og ávaxtaði peninga fyrir lífeyrissjóð sem ég gerði á þeim tíma. Þegar frumburðurinn, dóttir mín, hafði þroska og tækifæri til hvatti ég hana til að fjárfesta í hlutabréfum.

Þó umfangið hafi verið lítið var það gert í þeim tilgangi að kenna henni og gera henni grein fyrir tækifærunum. Þetta opnaði fyrir henni heim sem var áður svo fjarlægur.

Góðar fréttir

Hlutabréfamarkaðurinn hérna á landinu kalda er rétt að taka við sér nú fimm árum eftir hrun. Þrátt fyrir að þrjú ný félög hafi komið inn í Kauphöllina á árinu eru enn sárafá félög skráð þar. Útlit er fyrir að félögum haldi áfram að fjölga í Kauphöllinni því fréttir berast af fyrirtækjum á leiðinni á hlutabréfamarkað á næstu misserum. Það eru góðar fréttir.

Spennandi kostur

Fyrir lengra komna eru hlutabréfin eflaust mest spennandi fjárfestingarkosturinn í dag í ljósi þess hve almennar viðtökur hafa verið í hlutafjárútboðum ársins. Enn þá eru gjaldeyrishöft og þá má ekki fjárfesta í erlendum verðbréfum.

Því heyrast áhyggjuraddir af bólumyndun í lokuðu hagkerfi og að hlutabréf séu búin að hækka svo mikið á stuttum tíma að þau hljóti að vera of hátt verðlögð. Það má vel vera í einhverjum tilvikum og sjálfsagt að hafa vaðið fyrir neðan sig. Hlutabréf eru jú í eðli sínu áhættusöm fjárfesting og margir fóru flatt á þeim í hruninu.

Tækifæri fyrir alla

Sögulega hafa hlutabréf hins vegar reynst betri fjárfestingakostur en margt annað í dreifðu eignasafni. Þó fyrirtæki hækki í verði þarf það ekki að vera lögmál að verðið haldi ekki áfram að hækka. Þau félög sem eru vel rekin og með skýra framtíðarsýn eru líklegust til að skila eigendum sínum góðum arði til lengri tíma.

Eru hlutabréf þá bara fyrir lengra komna? Nei, þau þurfa ekki að vera það. Unga fólkið í dag þarf að kynnast hlutabréfamarkaðnum af eigin raun svo það geti tekið virkan þátt í uppbyggingu atvinnulífsins á eigin forsendum síðar meir og lært að nýta sér þau tækifæri sem þar bjóðast.