Næ ekki fullum krafti í skotin

Alexander Petersson, leikmaður Rhein-Neckar Löwen, þurfti að gangast undir skurðaðgerð á öxl í byrjun sumars til að ráða bót á þrálátum axlarmeiðslum. Þessi örvhenta skytta hefur undanfarin ár þurft að leika þrátt fyrir meiðslin og hann hefur ýmist verið sárþjáður eða mjög vel deyfður. Alexander tók því þá ákvörðun að fara í nauðsynlega aðgerð í byrjun júní.

Alexander leikur ásamt Rúnari Kárasyni og Stefáni Rafni Sigurmannssyni undir stjórn Guðmundar Guðmundssonar hjá Rhein-Neckar Löwen en skyttan hefur farið nokkuð vel af stað með ljónunum á tímabilinu.

„Aðgerðin sjálf gekk vel og var ég frekar fljótur að komast af stað en því miður eru enn þá verkir sem valda því að ég get ekki náð fullum krafti í skotin,“ segir Alexander.

„Það er alltaf erfitt að segja til um það hvort maður eigi eftir að ná sér að fullu eftir aðgerð á skothendi, en ég verð að vona það besta,“ segir Alexander. Hann lék ekki með íslenska landsliðinu á HM á Spáni í janúar vegna meiðslanna en hann hefur verið einn mikilvægasti leikmaður íslenska landsliðsins undanfarin ár.

Hefði sennilega átt að hvílast

„Síðustu tvö tímabil hafa verið upp og niður, alltaf verkir en misjafnlega miklir. Það voru tímar þar sem ég hefði sennilega betur átt að taka hvíld.“

Þýska deildin fer vel af stað en meistararnir í Kiel hafa fullt hús stiga og lærisveinar Guðmundar Guðmundssonar í Rhein-Neckar Löwen hafa ekki enn tapað leik og gert eitt jafntefli. Það má því fastlega búast við því að Alexander og félagar eigi eftir að vera í toppbaráttu í vetur.

„Við getum hæglega farið alla leið á þessu tímabili en það eru fjögur önnur lið sem gætu það einnig, deildin verður spennandi.“

Íslenska landsliðið tekur þátt á Evrópumótinu í handknattleik sem fram fer í Danmörku í janúar á næsta ári. Íslenska liðið hefur undanfarinn áratug verið með eitt besta handboltalið í Evrópu.

„Það eru spennandi tímar fram undan með landsliðinu en mikil vinna, þá sérstaklega fyrir Aron Kristjánsson [landsliðsþjálfara]. Ef allir eru að mestu meiðslalausir og í góðu formi er allt mögulegt. Því miður fá margir leikmenn ekki margar spilamínútur í liðunum sínum sem er visst áhyggjuefni að mínu mati. EM er mjög sterkt mót og þetta verður erfitt verkefni en við höfum oft sýnt að það eflir okkur bara.“