Advania hefur gert samning við gagnaver Verne Global á Ásbrú um sölu og uppsetningu á svokölluðu tölvuskýi fyrir bandaríska áhættugreiningarfyrirtækið RMS.
RMS sérhæfir sig í greiningu óhefðbundinna áhættuþátta fjármálafyrirtækja eins og náttúruhamfara, smitsjúkdóma og hryðjuverka. RMS hefur um það bil 70 prósenta markaðshlutdeild á heimsvísu á því sviði.
Gagnaver Verne Global, sem staðsett er á gamla varnarliðssvæðinu á Ásbrú, mun sjá um hýsingu á tölvuskýinu.
Eyjólfur Magnús Kristinsson, framkvæmdastjóri hjá Advania, segir samninginn hafa mikla þýðingu fyrir gagnaver á Íslandi en Advania hafi lengi barist fyrir slíkum iðnaði hér á landi.
„Þessi samningur er um það bil eins og hálfs milljarðs virði fyrir Advania, bara á þessu ári. Við vorum í harðri samkeppni við erlenda aðila um þennan samning. Þetta var því rosalegur sigur fyrir okkur,“ segir Eyjólfur
Milljarðasamningur Advania
