Gossip Girl-leikkona gjaldþrota

Kelly Rutherford, sem lék í þáttunum Gossip Girl, hefur óskað eftir gjaldþrotaskiptum. Hún hefur átt í harðvítugri forræðisdeilu við fyrrum eiginmann sinn sem hefur höggið stór skörð í fjárhag hennar.

Samkvæmt ABCNews.com skuldar Rutherford yfir tvær milljónir dala, eða um 250 milljónir króna. Eina og hálfa milljón af þeirri upphæð hefur hún greitt í lögfræðikostnað vegna forræðisdeilunnar.

Í ágúst síðastliðnum fyrirskipaði dómari að börn Rutherford og fyrrum eiginmanns hennar Daniel Giersch skyldu dvelja áfram í Frakklandi en þangað heimsóttu þau föður sinn síðasta sumar. Sú ákvörðun var mikið áfall, bæði tilfinningalegt og fjárhagslegt, fyrir hina 44 ára gömlu leikkonu.